საპარლამენტო უმრავლესობის ლიდერი დავით საგანელიძე აზერბაიჯანში, ბაქოს აეროპორტში „ნაციონალური მოძრაობის“ წევრებთან დაკავშირებულ ინციდენტს გამოეხმაურა:

“7 კითხვა ირაკლი სესიაშვილმაც დასვა, მაგრამ ამ 7-ს ალბათ, კიდევ ნოლს მივუწერდი. ამ კითხვებზე პასუხი არ არსებობს. განცხადება ფაქტებისა და ინფორმაციის მიხედვით გაკეთდა და მიმაჩნია, რომ ეს განცხადება რეალურია. ბუნებრივია, ამას ჭირდება აზერბაიჯანის სპეცსამსახურების გარკვეული მტკიცებულებები.

თუ არაფერი ხდებოდა, 4 საათის განმავლობაში სპეცსამსახურის მიერ რატომ იყვნენ გაჩერებული ქართველი პარლამენტის წევრები. გამცენ პასუხი, რატომ იყვნენ იქ, რატომ ჰყავდათ 4 საათი გაჩერებული ოთახში, მეც ბევრი მოგზაურობა მიწევს, აეროპორტი არ არის დარჩენილი, სადაც არ გამივლია, მით უმეტეს, ვიცი, როგორ ექცევიან დიპლომატიური პასპორტის მქონეს. როგორც ჩანს, ძალიან სერიოზულ თემებთან გვაქვს საქმე. არ გამოვრიცხავ, რომ საზღვრის დაცვის დეპარტამენტის რომელიმე წევრს ქრთამი აქვს აღებული და ამიტომ იმალება რაიმე დოკუმენტები”, - განაცხადა საგანელიძემ.