„არ მგონია, რომ ქვეყანა არჩევნების მეორე დღეს პრემიების მინიჭების თემაზე უნდა მსჯელობდეს“, - ამის შესახებ საქართველოს პრეზიდენტმა გიორგი მარგველაშვილმა ტელეკომპანია „იმედის“ გადაცემა „რეაქციაში“ ისაუბრა.

პრეზიდენტის განცხადებით, ქვეყანაში არსებობს გარკვეული სირთულეები, რომლებიც კონსტიტუციაში ცვლილებების შეტანამ გამოიწვია:

„ჩემთვის გაუგებარი იყო არჩევნების მეორე დღეს რუსთაველის პრემიაზე მსჯელობა. არ მგონია, რომ ქვეყანა არჩევნების მეორე დღეს პრემიების მინიჭების თემაზე უნდა მსჯელობდეს. მე არ მგონია, რომ ირაკლისთან დამეძაბა ურთიერთობა.

ჩვენს ქვეყანაში მოქმედებდა კონკრეტული წესი და კანონი, რომელიც იყო კონსტიტუცია, ამ კონსტიტუციის ფარგლებშიც კი წინა პრეზიდენტი კიდევ უფრო მეტ ძალაუფლებას ფლობდა ვიდრე იყო განსაზღვრული, 2013 წლის ინაუგურაციის შემდეგ კიდევ შეიცვალა კონსტიტუცია და ცვლილებები შევიდა, შედეგად გარკვეულ საკითხებზე არსებულ კითხვებზე პასუხი არ არის, ამ დინამიკიდან გამომდინარე რაღაც საკითხები მოუგვარებელია.

შედეგად ჩნდება რაღაც სირთულეები, ამ სირთულეებს არც ომს დავარქმევდი, არც სკანდალს, ეს არის ბუნებრივად ახალი კონსტიტუციის ძალაში შესვლის თემები“, - განაცხადა პრეზიდენტმა.