„ერთიანი ნაციონალური მოძრაობის“ წევრი ირმა ნადირაშვილი გუშინ აზერბაიჯანში მომხდარ გაურკვევლობას ეხმაურება. ირმა ნადირაშვილმა ტელეკომპანია „რუსთავი 2“-ის პირდაპირ ეთერში განაცხადა, რომ იგი ზურაბ ჯაფარიძესთან ერთად ერთობლივ სარჩელს ამზადებს და პატივისა და ღირსების შელახვისთვის საქართველოს ელჩს აზერბაიჯანში უჩივლებენ:

„დღეს სიამოვნებით ვისაუბრებდი იმ პრემიერბზე რომელიც გაიცა, მაგრამ ჩვენმა ხელისუფლებამ ჩამაყენა ისეთ მდგომარეობაში, როდესაც სხვა თემებზე მიწევს საუბარი, გუშინ ძალიან მძიმე და უჩვეულო დღე იყო ჩემთვის და ჩემი ოჯახის წევრებისთვის, მე ალბათ ვერასდროს ვიფიქრებდი, რომ შესაძლებელი იქნებოდა ასეთი რამ მომხდარიყო ჩემს თავს.

არავითარი განმარტება საელჩოდან არ მიმიღია, მთელი დღის განმავლობაში ვცდილობდი დავკავშირებოდი საქართველოს ელჩს აზერბაიჯანში, მაგრამ ამას ვერ მივაღწიე. ალბათ გულში ჩვენს ელჩს სრცხვენია იმის გამო, რაც მან გუშინ ჩაიდინა, მას არ შეუძლია გაგვცეს პასუხი იმაზე თუ რაზე დაყრდნობით მოგვაყენა მე და ზურაბ ჯაფარიძეს ასეთი დარტყმა.

იმ დროს როცა ელჩი ამბობდა, რომ ჩვენ დაკავებულები ვიყავით, ჩვენ ვიყავით ერთერთ კაფეში და ვსადილობდით, ეს არის მისი მხრიდან უსინდისო საქციელია.

ელჩის მოვალეობაა, როცა ადამიანს უჭირს მივიდეს და პრობლემების მოგვარებაში დაეხმაროს. იმის ნაცვლად, რომ საელჩო საკუთარი მოქალაქეების დაცვით იყოს დაკავებული, იგი დეზინფორმაციის გავრცელებით იყო დაკავებული, მე და ზურაბ ჯაფარიძე ვამზადებთ ერთობლივ სარჩელს და ღირსებისა და პატივის შელახვისთვის აუცილებლად ვუჩივლებთ“, - განაცხადა ირმა ნადირაშვილმა.