ხელისუფლების მხრიდან დისკრედიტაციად აფასებენ ბაქოში მომხდარ ფაქტს აზერბაიჯანიდან დაბრუნებული „ნაციონალური მოძრაობის“ წევრები. ირმა ნადირაშვილი და ზურაბ ჯაფარიძე უარყოფენ ქართულ მედიაში გავრცელებულ ინფორმაციას აეროპორტში მათი დაკავების შესახებ.

თავდაპირველად დაკავების მთავარ მიზეზად ელექტროშოკების საქართველოში შემოტანის მცდელობა დასახელდა, შემდეგ ეს ვერსია არადეკლარირებული ნახევარი მილიონი დოლარით შეიცვალა. ნადირაშვილისა და ჯაფარიძის თქმით თბილისში ჩამოსვლის შემდეგ კიდევ ერთხელ გაიარეს შემოწმება, თუმცა საეჭვო არაფერი აღმოუჩენიათ.

საპარლამენტო უმცირესობის წევრებმა აეროპორტში კიდევ ერთხელ განმარტეს შეყოვნების მიზეზი. არადეკლარირებული თანხის შესახებ აზერბაიჯანში საქართველოს ელჩმაც გააკეთა კომენტარი.

„ბაქოში, რამდენიმე ჩვენს კოლეგასთან შეხვედრა გვქონდა. შუადღეს უნდა გამოვფრენილიყავით, როდესაც გავიარეთ შემოწმება და მივედით საბაჟო კონტროლზე ერთერთმა მებაჟემ გადაწყვიტა, რომ მე უნდა შევემოწმებინე, ამის გამო დავაგვიანეთ რეისზე, მოგვიხადეს ბოდიში, გაგვაცილეს, შემდეგ გავიგეთ საქართველოდან ინფორმაცია იმის შესახებ, რომ თურმე დაგვაპატიმრეს, ამის შემდეგ მე და გოგა ხაჩიძემ გავაკეთეთ ის, რომ თბილისში განვახორციელეთ რამდენიმე ზარი, ვფიქრობდით, რომ გავერთობოდით, არაფერზე კონკრეტულზე არ გვისაუბრია, თუმცა, შევქმენით ისეთი განცდა, რომ რაღაც მოგქონდა, ვფიქრობდით რომ აქ კიდევ მოგვიწყობდნენ ჩხრეკას“, - განაცხადა ზურაბ ჯაფარიძემ.