საქართველოს პრეზიდენტის მრჩევლად საგარეო ურთიერთობათა საკითხებში თენგიზ ფხალაძე დაინიშნა.

ამის შესახებ პრეზიდენტის განკარგულებაშია ნათქვამი.

„საქართველოს პრეზიდენტმა დღეს გამოსცა განკარგულება საგარეო ურთიერთობათა საკითხებში ახალი მრჩევლის დანიშვნის შესახებ. ამ თანამდებობას თენგიზ ფხალაძე დაიკავებს, რომელიც 2008 წლიდან დღემდე ხელმძღვანელობს გეოპოლიტიკური კვლევების საერთაშორისო ცენტრს.

თენგიზ ფხალაძე არის აშშ-ს ატლანტიკური საბჭოსა და ბრიტანეთის საერთაშორისო ურთიერთობათა სამეფო ინსტიტუტის (Chatham House) წევრი. სხვადასხვა წლებში იგი იყო საქართველოს სახელმწიფოს მეთაურის დიპლომატიური პროტოკოლის სამსახურის ხელმძღვანელი, საქართველოს პრეზიდენტის სახელმწიფო რწმუნებულის მოადგილე მცხეთა-მთიანეთის მხარეში, ასევე აზერბაიჯანის რესპუბლიკაში საქართველოს საელჩოს საკონსულო სამსახურის ხელმძღვანელი. კითხულობს ლექციებს საქართველოს საზოგადოებრივ საქმეთა ინსტიტუტში“, - ნათქვამია განკარგულებაში.