დარახველიძე: "ქართულმა ოცნებამ" პრაქტიკულად ყველგან 70% აიღო

პოლიტიკა - 13:52, 19 Jun, 2014

1448

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი დავით დარახველიძემ ადგილობრივი თვითმმართველობის არჩევნები შეაფასა და განაცხადა, რომ მთავრობამ და ქვეყანამ ბოლო გამოცდაც წარმატებით ჩააბარა.
მინისტრის განცხადებით, არჩევნები ხელისუფლების და ქვეყნის შთამბეჭდავი გამარჯვება იყო 27 ივნისისა და ევროკავშირთან ასოცირების ხელშეკრულების ხელმოწერის წინ.
"ჩვენ დავამტკიცეთ დემოკრატიზაციის კურსის ურყეობა. ყველა ავტორიტეტული საერთაშორისო ორგანიზაცია და ჩვენი მეგობარი ქვეყნების ელჩები ამ ფაქტს უპირობოდ აღიარებენ და ხაზგასმით აღნიშნავენ", - განაცხადა მინისტრმა.
დარახველიძის განცხადებით, არჩევნებმა აჩვენა ასევე მოსახლეობის სრული მხარდაჭერა ხელისუფლებისადმი და ვერანაირი მანიპულაცია ციფრებით ამას ვერ გადაწონის და ვერ შეცვლის იმ ფაქტს, რომ დასრულდა საკრებულოებში "ნაციონალების" ბატონობის ხანა და "ქართულმა ოცნებამ" პრაქტიკულად ყველგან 70 პროცენტი აიღო.
"დარწმუნებულები ვართ, ასევე მეორე ტურში უპირობო გამარჯვებაში ყველგან და უპირველეს ყოვლისა - თბილისში. არანაკლებ მნიშვნელოვნად მიმაჩნია ის, რომ ქვეყანაში რეალური, ნამდვილი, ჯანსაღი დემოკრატიის დამკვიდრება ერთ-ერთი მთავარი გზა არის საქართველოს ტერიტორიული მთლიანობის აღდგენისკენ და ყველაზე მკაფიო და ყველაზე გასაგები გზავნილია ჩვენი აფხაზი და ოსი ძმებისთვის ნდობისა და ჯანსაღი ურთიერთობების დასამყარებლად", - დასძინა მინისტრმა.