სერგეენკო: წარმოუდგენელია მინისტრთა კაბინეტში მოღალატეების ძებნა

პოლიტიკა - 12:46, 19 Jun, 2014

1682

საქართველოს ჯანდაცვის მინისტრ დავით სერგეენკოსა და საქართველოს პრეზიდენტ გიორგი მარგველაშვილშს შორის საქმიანი და პიროვნული ურთიერთობა არ შეცვლილა.
აღნიშნულის შესახებ ჟურნალისტებთან თავად დავით სერგეენკომ ისაუბრა.
ჯანდაცვის მინისტრი პრეზიდენტის ყოფილი მრჩევლის ვანო მაჭავარიანის იმ კომენტარს გამოეხმაურა, რომლის თანახმადაც, ბიძინა ივანიშვილის განცახდების შემდეგ მთავრობამ პრეზიდენტისგან გარკვეული დინსტანცია დაიჭირა.
სერგეენკოს განცხადებით, არანაირ განცხადებას არანაირი გავლენა საქართველოს პრეზიდენტთან არ ჰქონია. მისივე ინფორმაციით, მარგველაშვილთან ბოლო შეხვედრა დაახლოებით ერთი თვის წინ პრეზიდენტის რეზიდენციაში ჰქონდა, როდესაც საპატრიარქოს ეგიდით გამოფენა ჩატარდა.
"თუმცა ცალსახად გიდასტურებთ, რომ არანაირ განცხადებას საქართველოს პრეზიდენტთან ურთიერთობაში, მითუმეტეს დისტანცირებაზე არ უქონია გავლენა. ის არის საქართველოს პრეზიდენტი, რომელსაც საქართველოს ყველა მოქალაქე ჩემი ჩათვლით პატივს სცემს და ჩვენი ურთიერთობა, როგორც საქმიანი, ასევე პიროვნული არ შეცვლილა ბოლო პერიოდში", - აღნიშნა სერგეენკომ.
მისივე განცხადებით, დისტანცირებისა და ცვლილებების ილუზია გაჩნდა, რადგან გასული წლის შემოდგომიდან საქართველოს ქვეყნის მართვა გადავიდა ახალ კონსტიტუციურ მოდელზე, სადაც პრეზიდენტს უკვე განსხვავებული ვალდებულებები და ფუქციები აქვს.
"ჩემი აზრით, შეხედულება რომ რაღაც დისტანცირება ხდება, გამოწვეულია საკონსტიტუციო ცვლილებებით. უბრალოდ, შეიცვალა ფორმატი საქართველოს პრეზიდენტის და ის ისე აქტიურად რეალურ აღმასრულებელ საქმიანობაში აღარ ერევა და აღარ უნდა ჩაერიოს. რას დავარქმევდი ამ ურთიერთობას, ჩემი აზრით, მე დავარქმევდი სახელმწიფოებრივ და კონსტიტუციურ ფორმატში საქმიან ურთიერთობას, როგორც უნდა იყოს", - განმარტა დავით სერგეენკომ.
მინისტრი ასევე გამოეხმაურა ე.წ. 4-5 მოღალატე მინისტრის თემას. დავით სერგეენკოს შეფასებით, წარმოუდგენელია მინისტრთა კაბინეტში მოღალატეების ძებნა.
"ღარიბაშვილის ადგილზე მე მომინდებოდა ზოგიერთი მინისტრის შეცვლა, - ამის შესახებ საქართველოს პრეზიდენტის ყოფილმა მრჩეველმა ვანო მაჭავარიანმა "მაესტროს ცხრიანში" განაცხადა. მისივე თქმით, "4-5 მოღალატე მინისტრის თემა ჰაერიდან მოტანილი არ არის".