აფხაზეთზე გამავალი რკინიგზის საკითხი - ვის ესაუბრა საქართველოში ვიზიტამდე სომხეთის პრეზიდენტი

პოლიტიკა - 21:19, 18 Jun, 2014

3452

აფხაზეთზე გამავალი რკინიგზის საკითხი შესაძლოა ისევ აქტუალური გახდეს.

სომხეთის პრეზიდენტის საქართველოში ვიზიტის პარალელურად რუსული პრესა, რუსეთ-საქართველოს-სომხეთის დამაკავშირებელი სარკინიგზო მიმოსვლის შესახებ აქტიურად წერს.

რუსეთის სარკინიგზო ხაზების ხელმძღვანელი ადგილობრივ მედიასთან საუბრისას აცხადებს, რომ აღნიშნული პროექტის აღდგენა მნიშვნელოვანია.

ვლადიმერ იაკუნინის განცხადებით, ეს თემა მან სომხეთის პრეზიდენტთან თბილისში გამგზავრებამდე განიხილა.

დღეს თბილისში ვიზიტისას აღნიშნულ საკითხზე კომენტარი გააკეთა სომხეთის პრეზიდენტმაც. სერჟ სარგსიანის განცხადებით, აღნიშნულ თემაზე სერიოზული საუბარი არ ყოფილა, თუმცა სომხეთს სარგინიგზო მაგისტრალის ამუშავება სურს.„სერიოზული საუბარი ამ თემაზე არ ყოფილა, თუმცა ჩვენ გვინდა , რომ ამ გზამ ფუნქციონირება დაიწყოს. ეს ჩვენთვის სასიცოცხლოდ მნიშვნელოვანია. რკინიგზის გახსნა არა მხოლოდ სომხეთსა და რუსეთზეა დამოკიდებული, არამედ სხვა მხარეებზეც და ჩვენ აქტიურად ვიმუშავებთ ამ თემაზე,“-განაცხადა სარგსიანმა „რუსთავი-2“-თან საუბრისას.გავრცელებული ინფორმაციით, აფხაზეთს 3 მილიონი რუბლი რკინიგზის აღსადგენად რუსეთმა უკვე გამოუყო. შეგახსენებთ, რომ სარკინიგზო მიმოსვლის საკითხზე საუბარი ჯერ კიდევ ერთი წლის წინ ბიძინა ივანიშვილის ერევანში ვიზიტის დროს გაჟღერდა.