შერიგებისა და სამოქალაქო თანასწორობის საკითხებში სახელმწიფო მინისტრ პაატა ზაქარეიშვილის განცხადებით, „სახალხო დამცველის ინიციატივა მისასალმებელია, თუმცა საჭიროებს განხილვას“.

ასე გამოეხმაურა ზაქარეიშვილი ომბუდსმენის ინიციატივას, ქართველი და ოსი პატიმრების გაცვლის თაობაზე.

„სახალხო დამცველის მოწოდებას მივესალმები. სმუშაოა ამ საკითხზე, მაგრამ მხოლოდ სახალხო დამცველის პოზიციები ვერ იქნება გათვალისწინებული, აქ გასათვალისწინებელია, რა ხდება აფხაზურ მხარეს, ცხინვალის მხარეს, რუსული ფაქტორი. მიმაჩნია, რომ საერთაშორისო ფორმატით უნდა მოხდეს ამ საკითხის მორიგება. მსგავს სიტუაციებში საერთაშორისო ფორმატი უფრო ეფექტურად მუშაობს, როცა მხარეებს შორის არის ხოლმე პრობლემები. თავად ფორმულა „ყველა ყველაზე“ მსოფლიოში მიღებული და ეფექტურია. ძალიან კარგია დაძაბულობის განსამუხტად, თუმცა ეს არ ნიშნავს, რომ მომავალში არ გვეყოლება პატიმრები. ვიდრე კონფლიქტი ამოწურული არ არის, ყოველთვის გვეყოლება გატაცებული ადამიანი, თუმცა ჩვენი პატიმრები მომავლის მძევლებად არ უნდა ვაქციოთ“,- განაცხადა ზაქარეიშვილმა.

მისივე თქმით, ინიციატივის მიღებაზე საუბარი ჯერ ნაადრევია.

„ჯერ ამოქმედებაზე საუბარი ზედმეტია. უნდა განიხილონ სახელმწიფო სტრუქტურებში, შემდეგ კი საჭიროა მეორე მხარეს გასვლა. თავად პრინციპი მისაღებია, უნდა ვიმსჯელოთ და თუ არ გამოვა, განვაცხადოთ, რომ არ გამოდის, ხოლო თუ გამოდის, უნდა ავამუშავოთ“,- დასძინა ზაქარეიშვილმა.