მანანა ბერიკაშვილი -პრემიის მინიჭების პრეროგატივა პრემიერის კომპეტენციაა

პოლიტიკა - 18:40, 18 Jun, 2014

1166

საქართველოს კულტურის და ძეგლთა დაცვის მინისტრის მოადგილის, მანანა ბერიკაშვილის განცხადებით, კულტურის სამინისტროს ინიციატივაა, რომ ყველა პრემია ყოველწლიურად არ გაიცეს. ამის შესახებ მანანა ბერიკაშვილმა ჟურნალისტებს განუცხადა.

ამით კულტურის მინისტრის მოადგილე შეკითხვას გამოეხმაურა, თუ რას ითვალისწინებდა ცვლილება, რომელიც კულტურის სამინისტრომ პრემიებთან დაკავშირებით წარადგინა.

მისი თქმით, მათი შეთავაზებაა, რომ ერთ წელს იყოს რუსთაველის პრემია, მეორე წელს - ეროვნული. "შესაძლებელია, ჩვენ ამაზეც ვმუშაობთ, რომ მესამე სახელმწიფო პრემია იყოს ვაჟა-ფშაველას სახელობის", - განაცხადა ბერიკაშვილმა.

კითხვაზე, რატომ გახდა აუცილებელი პრემიის მინიჭების პრეროგატივა პრემიერის კომპეტენცია გამხდარიყო, ბერიკაშვილმა აღნიშნა, რომ ამ კითხვაზე ის ვერ გასცემს პასუხს, რადგან ეს მისი კომპეტენცია არ არის.

"იმაზეც ვერ გეტყვით ზუსტ პასუხს, პრემიერის კომპეტენციაა თუ პრეზიდენტის. ჩემთვის ძალიან მნიშვნელოვანია და სახელმწიფო მუშაობს იმაზე, რომ ადამიანებს მიაგონ პატივი და დაუფასდეთ ის ღირსება, რომელიც აქვთ ჩვენს ქვეყნაში მოღვაწე ნიჭიერ შემოქმედებს და არა მარტო შემოქმედებს, არამედ მეცნიერებს და ა.შ. ჩვენ ვიფიქრეთ იმაზე, თუ როგორ გავაკეთოთ ეს, რომ არ გაუფასურდეს და ამ პრემიას ჰქონდეს ძალიან დიდი და მნიშვნელოვანი სტატუსი. ეს არის ჩემთვის ყველაზე მნიშვნელოვანი და ისიც, რომ პრემიას გასცემს სახელმწიფო", - განაცხადა ბერიკაშვილმა.
გუშინ მთავრობის სხდომაზე გადაიდო საკითხის განხილვა, რომელიც საქართველოს პრეზიდენტისთვის კიდევ ერთი უფლებამოსილების შესაძლო ჩამორთმევის საკითხს ეხებოდა. კერძოდ, შოთა რუსთაველის სახელობისა და საქართველოს ეროვნული პრემიების მინიჭების პრეროგატივის პრეზიდენტისგან პრემიერ-მინისტრის ხელში გადასვლას.