ფინანსთა მინისტრის ნოდარ ხადურის განცხადებით, 2014 წლის პირველ კვარტალში საშუალო ხელფასი 2013 წლის ანალოგიურ პერიოდთან შედარებით, დაახლოებით, 10%–ით გაიზარდა.

ხადურის თქმით, გასული წლის მეოთხე კვარტლისა და მიმდინარე წლის პირველი კვარტლის საშუალო ხელფასის შედარება არ შეიძლება, რადგან, მისივე თქმით, მეოთხე კვარტალში ყოველთვის მეტი ხელფასი გაიცემა.

„აღნიშნულ თემაზე არასწორი ინტერპრეტაცია მოხდა. თქვენ თუ ნახავთ, რაც სტატისტიკის ეროვნული სამსახური აქვეყნებს ამ ინფორმაციას, ყოველთვის, წინა წლის მეოთხე კვარტალში ხელფასი უფრო მაღალია, ვიდრე მომდევნო წლის პირველ კვარტალში. ეს გამოწვეულია იმით, რომ თუნდაც დეკემბერში არა ერთი, არამედ ხშირ შემთხვევაში 2 ხელფასი გაიცემა.

ასე იყო 2013, 2012 და სხვა წლებში. მინდა გითხრათ, რომ წელს პირველ კვარტალში დაახლოებით, 10%–ით არის შარშანდელ ანალოგიურ პერიოდთან შედარებით საშუალო ხელფასი გაზრდილი. ესაც სტატისტიკის ეროვნული სამსახურის ინფორმაციაა",- აღნიშნა ნოდარ ხადურმა.