სახალხო დამცველმა გამყოფ ხაზზე დაკავებებისა და პატიმრების შესახებ საინფორმაციო ნარკვევი გამოსცა

პოლიტიკა - 12:27, 18 Jun, 2014

452

სახალხო დამცველმა უჩა ნანუაშვილმა "გამყოფ ხაზზე დაკავებებისა და პატიმართა მდგომარეობის შესახებ სპეციალური საინფორმაციო ნარკვევი" გამოაქვეყნა.

როგორც დღეს გამართულ პრესკონფერენციაზე სახალხო დამცველმა განაცხადა, ნარკვევში ასახულია დაკავებულ პირთა სტატისტიკა და რეკომენდაციები, რომელიც საკითხის მოგვარების მიზნით ომბუდსმენის აპარატმა შეიმუშავა.

"ერთი წლის წინ პირველად გამოითქვა შეწყალების გზით პატიმართა ორივე მხარეს გათავისუფლების იდეა, რასაც დადებითი გამოხმაურება მოჰყვა არა მხოლოდ პატიმართა ოჯახის წევრებისგან, არამედ კონფლიქტის ორივე მხარეს მოქმედი სხვადასხვა ორგანიზაციების მხრიდან. წინგადადგმული ნაბიჯი იყო 2012-2013 წლებში ორი პატიმრის გათავისუფლებაც, თუმცა დღეისათვის ეს პროცესი შეჩერებულია", - განაცხადა უჩა ნანუაშვილმა.
მისივე თქმით, 2014 წლის 31 მაისის მდგომარეობით, ე.წ სამხრეთ ოსეთის გამყოფ ხაზზე საქართველოს მოქალაქე - 70 პირი იყო დაკავებული, ხოლო აფხაზეთის გამყოფ ხაზზე - 107.

"ცხინვალის ციხეში 3 ქართველი პატიმარი რჩება. ქართულ ციხეში კი, გამყოფი ხაზის ორივე მხარეს მცხოვრები 11 პატიმარი იხდის სასჯელს, რომელთა გათავისუფლების შესახებაც სხვადასხვა დროს მიმდინარეობდა მოლაპარაკებები. როგორც ოსი, ისე ქართველი პატიმრები და მათი ოჯახის წევრები რეგულარულად მიმართავენ სახალხო დამცველს და მოითხოვენ შეწყალებას და მხარეების ურთიერთშეთანხმებით, ორივე მხარის პატიმრობაში მყოფი პირების გათავისუფლებას. მოუგვარებელი კონფლიქტების შედეგები ასევე მწვავედ აისახება გალის რაიონში მცხოვრებ მოსახლეობის უფლებრივ მდგომარეობაზე. ამჟამად სოხუმსა და გალის რაიონში მცხოვრები არაერთი მკვიდრი ჰყავთ დაკავებული, ისევე როგორც თბილისში გალში მცხოვრები რამდენიმე პირი იხდის სასჯელს", - აცხადებს სახალხო დამცველი.

ნანუაშვილის განმარტებით, პატიმრების საკითხის გადაჭრის პარალელურად, მხარეები უნდა შეთანხმდნენ ისეთ მექანიზმებზე, რომლებიც უზრუნველყოფს გამყოფ ხაზზე დაკავებების მანკიერი პრაქტიკის აღმოფხვრას.