მიხეილ მაჭავარიანი - სამწუხაროა, რომ მთავრობა ჩატარებული არჩევნებით ტკბობასა და თრობაშია

პოლიტიკა - 21:30, 17 Jun, 2014

2173

სამწუხაროა, რომ ვიცე-პრემიერი, პრემიერ-მინისტრი და ზოგადად მთავრობა, ჩატარებული არჩევნებით ტკბობასა და თრობაში არიან , - ამის შესახებ ჟურნალისტებს "ერთიანი ნაციონალური მოძრაობის" ერთ-ერთმა ლიდერმა მიხეილ მაჭავარიანმა განუცხადა.

"ადგილობრივ არჩევნებში ჩვენი მოსახლეობის გზავნილი იყო პასიურობა, რადგან უკმაყოფილო არიან მთავრობის პოლიტიკით. მეორე გზავნილი იყო, რომ ჩვენი თანამოქალაქეები ძალიან წუხან გაზრდილ უმუშევრობაზე, ეკონომიკის გაჩერებაზე და კრიმინალის ზრდაზე. იმის მაგივრად, რომ მთავრობამ ამ საქმეებს მიხედოს, ზეიმებს აწყობენ", - აცხადებს მიხეილ მაჭავარიანი.

მაჭავარიანი მარნეულის ინცინდენტსაც გამოეხმაურა და აღნიშნა, რომ "საქმე უფრო მძიმედ და დრამატულადაა".

"თქვენ შეგიძლიათ შეხვიდეთ მარნეულის საკრებულოს საიტზე - ჯაბრაილ იუსუბოვი 2010 წელს საკრებულოს წევრი "ნაციონალური მოძრაობიდან" გახდა, მაგრამ 2012 წლის დეკემბრიდან არის მარნეულის საკრებულოს ფრაქცია "ქართული ოცნების" წევრი, ანუ გაგრძელებაა იმ გადამხტომი ადამიანებისა, რომლებიც როგორც კი 2012 წლის არჩევნები დასრულდა, "ქართულ ოცნებას" შეუერთდნენ", - განმარტავს მაჭავარიანი.

მისივე თქმით, ბიულეტენების ჩაყრით შედეგების გაყალბებას ჯაბრაილ იუსუბოვი მარტო ვერ მოიფიქრებდა და ამას ჰყავს სხვა ორგანიზატორებიც. როგორც მაჭავარიანი ამბობს, ამ შემთხვევაში საუბარი უნდა იყოს არამარტო ორი საარჩევნო უბნის გაუქმებაზე, არამედ პრეცედენტის შესწავლაზე, თუ რა მოხდა მარნეულში.

გუშინ "ნაციონალური მოძრაობის" ერთ-ერთმა ლიდერმა გიგი უგულავამ მარნეულის 22-ე საარჩევნო ოლქის 25-ე და 57-ე საარჩევნო უბნებზე გადაღებული გაყალბების ამსახველი ვიდეომასალა წარადგინა. უგულავს თქმით, კადრებში ჩანს, რომ ერთი და იგივე პირი საარჩევნო ყუთში რამდენიმე ბიულეტენს აგდებს. მისი თქმით, ეს პირი არის ნაზიმ ალიევი, რომელიც მარნეულის დეპუტატის ნათესავია და ადგილობრივ ავტორიტეტად მიიჩნევა.

გიგი უგულავას საპასუხოდ "ქართული ოცნების" საარჩევნო შტაბის პრესსპიკერმა გიორგი გეგეჭკორმა განაცხადა, რომ "ნაციონალური მოძრაობის" მიერ გავრცელებულ კადრებში, რომელშიც ასახულია მარნეულის ერთ-ერთ საარჩევნო უბანზე ყალბი ბიულეტენების ჩაყრის ფაქტი, ფიგურირებს "ნაციონალური მოძრაობის" საკრებულოს დეპუტატის, ჯაბრაილ უსუბოვის ცოლის ძმა ნაზიმ ალიევი.