ჭიდაობის ფედერაციის პრეზიდენტად ლუკა კურტანიძე აირჩიეს

სპორტი - 21:48, 15 Dec, 2012

1360

15 დეკემბერს, სპორტისა და ახალგაზრდობის საქმეთა სამინისტროს საკონფერენციო დარბაზში ჭიდაობის ფედერაციის არჩევნები გაიმართა. 16:00 საათზე დაწყებულმა არჩევნებმა 20:00 საათამდე გასტანა და საბოლოოდ ლუკა კურტანიძის გამარჯვებით დასრულდა. 110 დელეგატიდან არჩევნებზე 103 გამოცხადდა, საიდანაც 58 ხმა ლუკა კურტანიძე მიიღო, ხოლო 45 გეგა გეგეშიძემ. მომდევო 4 წლის განმავლობაში ჭიდაობის ფედერაციას ლუკა კურტანიძე უთავკაცებს.

ვიცე-პრეზიდენტად თავისუფალი სტილით მოჭიდავეთა კვოტით 54 ხმით დიმიტრი გელაშვილი აირჩიეს, ბერძნულ-რომაული სტილით მოჭიდავეთა კვოტა კი თემურ ყაზარაშვილს შეხვდა, ვინც 67 ხმა მიიღო. 87 ხმით დამაჯერებლად იმარჯვა სათათბიროს კვოტით ვიცე-პრეზიდენტობის მსურველმა ედიშერ მაჩაიძემ, რომელსაც კონკურენტი არ ჰყავდა.

ყველაზე დაძაბული გენერალური მდივნის პოსტისთვის ბრძოლა გამოდგა, სადაც მოქმედმა გენდმივანმა მალხაზ ჯორბენაძემ 1 ხმით წააგო გიორგი ლომიძესთან - 47:48. არჩევნების დასრულების შემდეგ პრეზიდენტობის ორივე კანდიდატმა კომენტარი გააკეთა.

ლუკა კურტანიძე: მადლობა დელეგატებს მხარდაჭერისთვის და ამ დიდი პასუხისმგებლობის მონიჭებისთვის. ყველა პროფესიონალი დაფასებული იქნება და მათ გამოცდილებას სათანადოდ გამოვიყენებთ. ჭიდაობა გახდება ისეთივე საამაყო როგორც ადრე იყო, მოჭიდავეები საკუთარი ქვეყნის და ერის სამსახურში ჩადგებიან და მხოლოდ გულშემატკივრის გასახარებლად იბრძოლებენ. კიდევ ერთხელ უდიდესი მადლობა ყველას მხადაჭერისთვის და დაფასებისთვის. მჯერა ერთიანობით ბევრს მივაღწევთ".

გეგა გეგეშიძე: ორი ღირსეული კანდიდატი იყო და საბოლოოდ ისე მოხდა, რომ მე დავმარცხდი. ვულოცავ ლუკას და წარმატებას ვუსურვებ. თუ მისი სურვილი იქნება, მზად ვარ ჭიდაობის სამსახურში ჩავდგე. ახლა მთავარია, რომ ყველამ ერთად გაისად თბილისში გასამართ ევროპირველობაზე ვიფიქროთ და ასეთ დიდ შეჯიბრებას ღირსეულად ვუმასპინძლოთ. ამასთან, ყველაფერი გავაკეთოთ იმისთვის, რომ ჩვენი ბიჭები ევროპის პირველობაზე დამაჯერებლად გამოვიდნენ".