თანამდებობის პირების მივლინებებისთვის გაწეულმა ხარჯმა 43 507.61 ლარი შეადგინა

პოლიტიკა - 17:38, 17 Jun, 2014

614

ინფორმაციის თავისუფლების განვითარების ინსტიტუტის (IDFI) ინფორმაციით, 2013 წელს დაზვერვის სამსახურის თანამდებობის პირების მივლინებებისთვის გაწეულმა ხარჯმა 43 507.61 ლარი შეადგინა, ხოლო უცხოური დელეგაციების მიღებასა და მათთვის ჩატარებულ ღონისძიებებზე 114 620.98 ლარი დაიხარჯა.

„მისასალმებელია ის ფაქტი, რომ საქართველოს დაზვერვის სამსახურმა ინსტიტუტის ყველა მოთხოვნა სრულყოფილად დააკმაყოფილა. დაზვერვის სამსახური სხვა ძალოვანი უწყებებისგან განსხვავებით (მაგ., შინაგან საქმეთა სამინისტრო და მის დაქვემდებარებაში მყოფი უწყებები, პროკურატურა და სხვა) წლების განმავლობაში ინარჩუნებს ინფორმაციის ხელმისაწვდომობის მაღალ მაჩვენებელს.

მათ მიერ დეტალურად იქნა გასაჯაროებული იმგვარი ინფორმაცია, რომელიც სახელმწიფო საიდუმლოებას არ შეიცავს. მაგალითად 2013 წელს საქართველოს დაზვერვის სამსახურის თანამდებობის პირების მივლინებებისთვის გაწეულმა ხარჯმა ჯამში 43 507.61 ლარი შეადგინა. ამასთან, დაზვერვის სამსახურში გასულ წელს სხვადასხვა უცხოური დელეგაციების მიღებასა და მათვის ჩატარებულ ღონისძიებებზე 114 620.98 ლარი დაიხარჯა. სამსახურის ხელმძღვანელზე და მის პირველ მოადგილეზე 2013 წელს „როუმინგულ“ მომსახურებაზე გაწეულმა ხარჯმა კი სულ 4 721.73 ლარი შეადგინა“, - აღნიშნულია IDFI-ს მიერ გავრცელებულ ინფორმაციაში.