დსთ-ს სისტემა ვეღარ იქნება კომფორტული მოლდოვასთვის

დსთ-ს სისტემა ვეღარ იქნება კომფორტული მოლდოვასთვის - ლიხაჩოვის გაფრთხილება მოლდოვას

პოლიტიკა - 10:54, 17 Jun, 2014

585

რუსეთმა მოლდოვა ევროკავშირთან ინტეგრაციის რისკებზე გააფრთხილა. ამის შესახებ "რია ნოვოსტის" რუსეთის ეკონომიკის მინისტრის მოადგილე, ალექსეი ლიხაჩოვმა განუცხადა.
მისივე თქმით, მოლდოვამ არჩევანი დსთ-სა და ევროკავშირს შორის უნდა გააკეთოს.

"თუ მოლდოვა არჩევანს ევროკავშირის სისტემის სასარგებლოდ გააკეთებს, მაშინ დსთ-ს სისტემა ვეღარ იქნება კომფორტული. ჩვენი ეს შეხედულება მოლდოველ კოლეგებსაც გავუზიარეთ, თუმცა მათ გვითხრეს, რომ შეძლებენ ამისთვის თავის აცილებას", - განაცხადა ალექსეი ლიხაჩიოვმა.

რუსეთის ეკონომიკის მინისტრის მოადგილის თქმით, კი რუსეთმა მოლდოვა იმ რისკების შესახებაც გააფრთხილა, რომელსაც დიდი ალბათობით ორივე ქვეყნა შეეჯახება იმ შემთხვევაში, თუ მოლდოვა ევროკავშირთან ასოცირების შეთანხმებას მოაწერს ხელს.

,,რუსეთის პოზიცია პრაგმატულია და არ უკავშირდება მოლდოვას პოლიტიკურ არჩევანს", - ამბობს ლიხაჩოვი. მისივე თქმით, საუბარია მხოლოდ ეკონომიკურ რისკებზე.

ალექსეი ლიხაჩიოვმა ასევე ხაზი გაუსვა, რომ დსთ-ს თავისუფალი ვაჭრობის ზონის შესახებ მოქმედი ხელშეკრულება საბაჟო კავშირს საკუთარი ბაზრის დაცვის მექანიზმების ამოქმედების უფლებას აძლევს იმ შემთხვევაში, თუ დსთ-ს, რომელიმე წევრი-ქვეყანა თავისუფალ სავაჭრო ზონას შექმნის მესამე მხარესთან.

გარდა ამისა, ევროკავშირთან ასოცირების შეთანხმების ხელმოწერის შემთხვევაში მოლდოვას შესაძლოა წინააღმდეგობრივი ვალდებულებები გაუჩნდეს საბაჟო, სატრანსპორტო დარეგულირებასთან, სანიტარულ და მიგრაციულ კონტროლთან დაკავშირებით. ამასთან, ლიხაჩოვის განმარტებით, ყველაზე მტკივნეული შესაძლოა სწორედ სანიტარული ნორმებისა და საიმიგრაციო პოლიტიკის სფეროში შეუსაბამობა აღმოჩნდეს.