პარლამენტის თავმჯდომარის დავით უსუფაშვილის განცხადებით, „კოალიცია „ქართულ ოცნებას“ თვითმმართველობის არჩევნებში უპირობო გამარჯვება რომ მოეპოვებინა, ეს ხელისუფლაბაზე უარყოფითად აისახებოდა, არჩევნების ასეთმა შედეგებმა კი ხელისუფლებას დაანახა, რომ საზოგადოება ფხიზლად ადევნებს თვალს და საჭიროა მეტი მუშაობა“.

ამის შესახებ უსუფაშვილმა ტელეკომპანია „იმედის“ ეთერში, "ქრონიკაში" პირდაპირი ჩართვის დროს განაცხადა.

„საქართველოს მოსახლეობა უპირობოდ ენდობა კოალიცია „ქართულ ოცნებას“, მაგრამ მას მკაფიოდ მიანიშნებს, რომ საჭიროა მეტი მუშაობა, უკეთესი მუშაობა იმისათვის, რომ ეს მხარდაჭერა იყოს გარანტირებული ხვალისთვისაც და ზეგისთვისაც. მოსახლეობა, დღევანდელი მდგომარეობით, ვერ ხედავს უკეთეს ალტერნატივას, ვისაც გადააბარებდა ხელისუფლებას, მაგრამ „ქართულ ოცნებას“ მიანიშნებს, რომ არავინ და არაფერია ქვეყანაზე მუდმივი და საჭიროა მეტი მუშაობა - მოსახლეობისთვის მათი პრობლემების უკეთ და უფრო სწრაფად მოგვარება. ამ არჩევნებმა არანაირად არ მოგვცა ეიფორიის საშუალება. იქნებოდა ცუდი ყველგან და ყველაფერში რომ გაგვემარჯვებინა და მიგვეღო 70%-80%, ეს უარყოფითად იმოქმედებდა ჩვენს საქმიანობაზე. ასეთ დროს ჩავთვლიდით, რომ არაფერი პრობლემა არ არის და დღეს ჩვენ დავინახეთ, რომ მოსახლეობა ფხიზლად გვადევნებს თვალს. ამ გზავნილს ადეკვატურად გადავზრდით ძალიან კონკრეტულ საქმეებში“,- განაცხადა უსუფაშვილმა.

მისივე განცხადებით, ის თვითმმართველობის არჩევნებზე უფრო მეტ აქტივობას ელოდა. საკანონმდებლო ორგანოს თავმჯდომარე ამბობს, რომ მხარდამჭერების აქტივობასც და პასიურობაც კონკრეტული კანდიდატების დამსახურებაა.

„თუ კარგია აქტივობა და თუ ცუდია აქტივობა, ორივე კანდიდატების დამსახურებაა. მათ უნდა იზრუნონ, რომ პასიური ამომრჩევლების გარდა, აქტიურებიც ჰყავდეთ. თუმცა ვინც დარჩა სახლში, ამით არჩევენებს ჩრდილი არ მისდგომია. მე ცოტა უფრო მეტ აქტივობას – 46%-47%-ს ველოდებოდი“,- განაცხადა უსუფაშვილმა.