მაია ფანჯიკიძე - ელჩებმა აღნიშნეს, რომ არჩევნებზე დარღვევებს ადგილი არ ჰქონია

პოლიტიკა - 18:30, 16 Jun, 2014

1438

დიპლომატიური კორპუსის განცხადებით, “თვითმმართველობის არჩევნები იყო მართლაც სამართლიანი, მშვიდი და ნამდვილად შეუწყო ხელი საქართველოში დემოკრატიის განმტკიცებას”.

ამის შესახებ საგარეო საქმეთა მინისტრმა მაია ფანჯიკიძემ დიპლომატებთან შეხვედრის შემდეგ განაცხადა, რომელსაც ევროპულ და ევროატლანტიკურ სტრუქტურებში სახელმწიფო მინისტრი ალექსი პეტრიაშვილიც ესწრებოდა.
ფანჯიკიძის თქმით, “შეფასებებისგან ელჩები თავს იკავებენ, რადგან საბოლოო შედეგები ცნობილი არ არის, მაგრამ გარდა მცირეოდენი დარღვევებისა, რაც ცნობილია, ფაქტიურად, არანაირი კრიტიკა გამოთქმული არ არის”.
“შეხვედრა არჩევნების შეფასებას ისახავდა მიზნად, ასევე იმის აღნიშვნას, რომ გუშინ იყო ისტორიული დღე საქართველოს და ქვეყნის დემოკრატიული განვითარების ისტორიაში, რადგან პირველად ჩატარდა ადგილობრივი თვითმმართველობის არჩევნები თავისუფალ და დემოკრატიულ გარემოში. შეხვედრა ასევე ისახავდა მიზნად ელჩებისთვის ცესო-ს ამ დროისთვის არსებული შედეგების გაცნობას. გვაინტერესებდა, როგორ ჩაიარა არჩევნებმა იმ უბნებზე, სადაც ისინი იყვნენ და საერთოდ, როგორ აფასებენ მთელ არჩევნებს. მათი მხრიდან აღინიშნა, რომ დარღვევებს ადგილი არ ჰქონია და ყველაფერმა მშვიდ და კარგ გარემოში ჩაიარა”, - განაცხადა ფანჯიკიძემ.