„არჩევნებში „ნაციონალურმა მოძრაობამ“ და „ქართული ოცნების“ ნაციონალურმა ფრთამ გაიმარჯვა”, - ამის შესახებ განცხადება „ნინო ბურჯანაძე - ერთიანი ოპოზიციის“ ლიდერმა განაცხადა:

„ადგილობრივი თვითმმართველობის არჩევნებში „ნაციონალურმა მოძრაობამ“ და „ქართული ოცნების“ ნაციონალურმა ფრთამ გაიმარჯვა კახა კალაძის მეთაურობით. უკვე რამდენჯერ გვიწევს საუბარი იმასთან დაკავშირებით, რომ ჩვენს ქვეყანაში „ნაციონალური მოძრაობის“ გამოგონილი არჩევნების მანიპულირებისა და გაყალბების ტექნოლოგიები შესანიშნავად მოირგო „ქართულმა ოცნებამ“ და კარგად გამოიყენა როგორც საპარლამენტო, ასევე ადგილობრივი თვითმმართველობის არჩევნებში. როგორც ჩანს, „ქართული ოცნება“ ხელისუფლებაში მოვიდა არა იმისთვის, რომ ქართველი ხალხისთვის „ნაციონალური მოძრაობა“ მოეშორებინა, არამედ იმისთვის, რომ ჩემი და ჩემი თანაგუნდელებისთვის ხელისუფლებაში მოსვლის შესაძლებლობა არ მიეცა

გადავთვალოთ და ვნახოთ, რა არის რეალობა. მეორე ტურში ჩვენი კანდიდატები იბრძოლებენ გამარჯვებისთვის, თუმცა, იქ, სადაც მეორე ტურში ერთმანეთს „ნაციონალური მოძრაობისა“ და „ქართული ოცნების“ წარმომადგენლები დაუპირისპირდებიან, ჩვენ არ ვაპირებთ გავაგრძელოთ მონაწილეობა „ნაციონალებისა“ და „ქართული ოცნების“ გარიგებაში და სადაც არ არის ჩვენი კანდიდატი და სხვა ოპოზიციური პარტიის კანდიდატურაა, მზად ვართ, რომ მათ დავუჭიროთ მხარი, ოღონდ ოპოზიციაში „ნაციონალურ მოძრაობას“ არ ვგულისხმობ“, - განაცხადა ბურჯანაძემ.