ექსპერტი კახა კახიშვილი თვითმმართველობის არჩევნებს აფასებს და ხელისუფლებას დაფიქრებისკენ მოუწოდა. მისი თქმით, თუ „ქართული ოცნება“ სირაქლემას პოზაში ყოფნას გააგრძელებს, 2016 წლის არჩევნები უარესი შედეგით დასრულდება“.

“თუ “ქართული ოცნება” გააგრძელებს სირაქლემის პოზაში ყოფნას, ხალხის არმოსმენას, თუ გააგრძელებს პრემიების აღებას, ძვირადღირებული მანქანების ყიდვას, უკონკურენტო და არაპოპულარული კანდიდატების წარდგენას, ამავდროულად კმაყოფილი სახეებით პრესკონფერენციების ჩატარებას, გარწმუნებთ, რომ 2016 წლის არჩევნები გაცილებით უარესი შედეგით დასრულდება მისთვის. “ოცნებამ” ყველაფერი გააკეთა, რომ რეანიმირება მოეხდინა “ნაციონალური მოძრაობისა”. როდესაც ჩვენ ვსაუბრობდით, რომ ხელისუფლებას რეალურად მოსახლეობასთან კომუნიკაცია არ აქვს, გვეუბნებოდნენ, რომ რაღაც გვეშლება”, - განაცხადა კახიშვილმა.

მისი თქმით, ხელისუფლება მხოლოდ საკუთარ გარემოცვაში ტრიალებს და ხალხის რეალური მდგომარეობის შესახებ ინფორმაცია არ აქვს.

კახიშვილი მიიჩნევს, რომ “ნაციონალური მოძრაობა”, როგორც პარტია, გაცილებით ორგანიზებულია.

“2012 წელს 1 ოქტომბერს ხალხი გამოცხადდა საუბნო საარჩევნო კომისიებში და საპროტესტო ხმა მისცა ხელისუფლებას ანუ თქვა - “მე არ მინდა მიშა”. 2014 წლის 15 ივნისს იგივე მოსახლეობა პროტესტის ნიშნად აღარ მივიდა არჩევნებზე. ეს ნიშნავს იმას, რომ ხალხს 10-მეტრიანი ბილბორდების არ სჯერა. იმედს ვიტოვებ, რომ ახლა მაინც გააკეთებენ დასკვნას, რომ პრემიები აიღეს არაფერში, რადგან არაფერი გაუკეთებიათ, რისი მოლოდინიც იყო და ეს აისახა არჩევნებზე”, - განაცხადა კახიშვილმა.