პოლიტილოგი გია ნოდია მიიჩნევს, რომ თვითმმართველობის არჩევნებზე საპრეზიდენტო არჩევნებთან შედარებით, თვალსაჩინო გაუარესება შეიმჩნეოდა.

როგორც დღეს გამართულ პრესკონფერენციაზე ნოდიამ განმარტა, თვალსაჩინო გაუარესება ფიზიკურ ძალადობასა და ფარულ ზეწოლაში გამოვლინდა.

„საპრეზიდენტო არჩევნებთან შედარებით თვალსაჩინო გაუარესება შეიმჩნევა. ეს გამოვლინდა ფიზიკური ძალადობის გახშირებაში, რომელიც ფარულ ზეწოლაში გამოიხატა, ამან კი ბევრი კანდიდატურის მოხსნა გამოიწვია“ – განაცხადა დღეს ჟურნალისტებთან შეხვედრისას გია ნოდიამ.

ექსპერტი მიიჩნევს, რომ თვითმმართველობის არჩევნებზე გარემო გაცილებით კონკურენტული იყო, ვიდრე - წინა არჩევნებზე.

„გარემო უფრო კონკურენტული იყო, ვიდრე წინა არჩევნების დროს, თუმცა საქართველოში სამწუხარო კანონზომიერება შეიმჩნევა: რაც უფრო კონკურენტულია არჩევნები, მით უფრო მეტი დარღვევა შეიმჩნევა“ – აღნიშნა პოლიტოლოგმა.

რაც შეეხება შედეგებს, ნოდიას თქმით ხალხმა აშკარად თვა, რომ "ნაციონალური მოძრაობა" ძირითადი ოპოზიციური ძალაა.

„რომ ვიყოთ ჩამოყალიბებული დემოკრატიული ქვეყანა, ვიტყოდით, რომ „ქართულმა ოცნებამ“ სერიოზულ წარმატებას მიაღწია. მართალია, მისმა რეიტინგმა იკლო, რაც არჩევნების შედეგებზეც აისახა, მაგრამ ფაქტია, რომ ისინი იმარჯვებენ, რაც სერიოზული წარმატებაა სახელისუფლებო პარტიისათვის. მაგრამ თუ ღარიბაშვილის მიერ გამოცხადებულ მიზანს გავითვალისწინებთ, რომ „ნაციონალური მოძრაობა“ რადარებიდან გაქრა“ ან „უნდა გაქრეს“, რა თქმა უნდა, ამ მიზნის თვალსაზრისით ხელისუფლებამ წააგო, ანუ ვერ შეძლო „ნაციონალური მოძრაობის“ საბოლოოდ განადგურება. ბევრგან იქნება მეორე ტური და სავარაუდოდ, მეორე ტურშიც „ქართული ოცნება“ გაიმარჯვებს, მაგრამ აქ მთავარია კითხვა: შეიცვლება თუ არა პოლიტიკური კონკურენციის და თანამშრომლობის პირობები. აქამდე „ ქართული ოცნება“ „ნაციონალურ მოძრაობას“ ლეგიტიმურ ოპოზიციად არ აღიარებდა. ახლა, წესით, ეს მას უფრო უნდა გაუჭირდეს, რადგან წინააღმდეგობაში მოდის ხალხის აზრთან, რომელმაც აშკარად თქვა, რომ ,,ნაციონალური მოძრაობა“ არის ძირითადი ოპოზიციური ძალა. თუმცა ეს არ არის გარანტია იმისა, რომ პოლიტიკური პროცესები ნორმალიზაციისკენ წავა“– აღნიშნა ნოდიამ.