ყოფილი უფლებადამცველი, სტუდენტი ბექა ცხადაძე ადგილობრივი თვითმმართველობის არჩევნების მიმდინარეობისას ერთ-ერთ საარჩევნო უბანზე არსებულ დარღვევებზე საუბრობს. როგორც ცხადაძემ „ნიუპოსტთან“ საუბრისას განაცხადა თერჯოლის რაიონის სოფელ ახალთერჯოლის ერთერთ საარჩევნო უბანზე ადგილი ჰქონდა საარჩევნო კოდექსის არა ერთ დარღვევას:

„თერჯოლის რაიონი, სოფელ ახალთერჯოლის საარჩევნო უბანი. 08:00 საათიდან ვიმყოფებოდი საარჩევნო უბანზე. პირველი, რაც თვალში მომხვდა იყო საარჩევნო უბნის შესასვლელთან მდგომი, საქართველოს უმაღლესი საკანონმდებლო ორგანოს ერთ-ერთი წარმომადგენლის ახლო ნათესავი, რომელსაც უბნიდან გამოსულმა რამდენიმე მოქალაქემ ანგარიში ჩააბარა სიტყვებით "ყველაფერი ისეა, როგორც შევთანხმდით". მისი ვინაობის დასახელებისგან თავს შეიკავებ.

საქართველოს კანონმდებლობით, შეზღუდული შესაძლებლობების მქონე პირები სარგებლობენ უფლებით, მოახდინონ საკუთარი საარჩევნო უფლების რეალიზება საარჩევო უბანზე გამოუცხადებლად. სამწუხაროდ, აღნიშნულ რეგიონში დაფიქსირდა რამდენიმე შემთხვევა, როცა საარჩევნო კომისიის წარმომადგენლებმა საკუთარ საცხოვრებელ ადგილზე ხმის მიცემის უფლება მისცეს მოქალაქეებს, რომლებიც არ მიეკუთვნებიან შეზღუდული შესაძლებლობების მქონდე პირებს. ერთ-ერთი ასეთი ვიზიტის დროს გაუჩინარდა საარჩევნო ბიულეტინების კონტეინერი, მოგვიანებით გაირკვა, რომ საარჩევნო კომისიის წარმომადგენლებს ის ამომრჩეველთან საცხოვრებელ სახლში დარჩათ.

დამკვირვებლები საარჩევნო პროცესის ზედამხედველობას ახორციელებდნენ არა იმდენად უშუალოდ საარჩევნო უბანზე, რამდენადაც საარჩევნო უბნის მიმდებარე ტერიტორიაზე, რამდენიმე მათგანი საარჩევნო უბნის მოშორებით ახლობლების მოკითხვით იყო დაკავებული. იყო შემთხვევა, როდესაც ერთ-ერთ დამკვირვებელს მოქალაქემ სთხოვა განემარტა, ჰქონდა თუ არა უფლება სამივე ბიულეტინში არჩევანი გაეკეთებინა სხვადასხვა პოლიტიკური ძალის სასარგებლოდ, რის პასუხადაც მიიღო, რომ ეს დაუშვებულია“, - აცხადებს ბექა ცხადაძე „ნიუპოსტთან“ საუბრისას.