კენჭისყრის პროცესი დასრულდა, საარჩევნო უბნები 20:00 სთ-ზე დაიხურა და საუბნო საარჩევნო კომისიებში უკვე დაიწყო ხმების დათვლის პროცესი. არჩევნებმა მნიშვნელოვანი დარღვევების გარეშე, მშვიდ გარემოში ჩაიარა.

20:00 საათის მონაცემებით არჩევნებში მონაწილეობა მიიღო 1 485 372-მა ამომრჩეველმა, რაც ამომრჩეველთა საერთო რაოდენობის 43,31% - ია. 2013 წლის საპრეზიდენტო არჩევნებზე 20:00 სთ-ის მდგომარეობით ამომრჩეველთა აქტივობა იყო 46.6%.

როგორც ცესკოს სპიკერმა ეკა აზარაშვილმა ჟურნალისტებს განუცხადა, ცესკოში რამდენიმე წუთის წინ შემოვიდა ინფორმაცია, რომ ხონის 22-ე საარჩევნო უბანზე შეიჭრნენ უცხო პირები და დაამტვრიეს საარჩევნო ყუთი. სამართალდამცავები უკვე ადგილზე არიან და მიმდინარეობს საქმის შესწავლა. დეტალურ ინფორმაციას ამ ფაქტის შესახებ ცესკო მოგვიანებით გაავრცელებს.

ასევე აღინიშნა რომ თვითმმართველობის არჩევნებზე ბიულეტენებისა და კანდიდატების სიმრავლიდან გამომდინარე, წინასწარი შედეგების დათვლას საპრეზიდენტო არჩევნებთან შედარებით მეტი დრო დაჭირდება.

ცესკოს სპიკერმა განმარტა, რომ მას შემდეგ რაც ცესკო მიიღებს საუბნო საარჩევნო კომისიების შემაჯამებელ ოქმებს, ეს დოკუმენტები დაუყოვნებლივ აიტვირთება ცესკოს ვებ-გვერდზე - results.cec.gov.ge და ყველას ექნება საშუალება თვალი ადევნოს ამ პროცესს.

ბრიფინგის ბოლოს ეკა აზარაშვილმა მადლობა გადაუხადა ამომრჩევლებს და არჩევნებში ჩართულ ყველა მხარეს საარჩევნო პროცესის მშვიდ გარემოში წარმართვისთვის.