საპარლამენტო უმცირესობის წევრი, „ნაციონალური მოძრაობის“ ერთერთი ლიდერი გიორგი კანდელაკი ჩატარებული არჩევენების შესახებ კომენტარს აკეთებს. კანდელაკი მიიჩნევს, რომ მეორე ტური გარდაუვალია, მმართველი გუნდი კი არაადეკვატურად იქცევა, როცა არჩევნებში გამარჯვებას ეგზიტპოლების შედეგების საფუძველზე აღნიშნავს:

„დღევანდელ მთავრობას საზეიმო არაფერი არ აქვს, ეს არასწორი საქციელია, ყველა წინაპირობა მიუთითებს იმაზე, რომ იქნება მეორე ტური თბილისში, მტკიცება იმისა, რომ არ იქნება მეორე ტური პრემიერმინისტრის მხრიდან არის არაადეკვატური და არადემოკრატიული, ეს აჩვენებს იმას, რომ ის ძალადობა რომელსაც ადგილი ჰქონდა წინასაარჩევნო პერიოდში გადავა ცესკოს მხარეს.

ყველა მონაცემი, რაც ჩვენ გაგვაჩნია ჩვენი წარმომადგენლებიდანაც სწორედ მეორე ტურის გარდაუვალ ალბათობაზე მიანიშნებს, მე ვურჩევდი მთავრობას, რომ ამ არაადეკვატური თვითკმაყოფილების ნაცვლად საკუთარ შეცდომებზე იფიქრონ და იზრუნონ“, - განაცხადა გიორგი კანდელაკმა.