„ნაციონალური მოძრაობა“ კოლიცია „ქართული ოცნების“ მაჟორიტარი დეპუტატობის კანდიდატ ია მაკასარაშვილს ჟურნალისტებზე ზეწოლაში ადანაშაულებს.

ზურაბ ჭიაბერაშვილმა დღეს გამართულ ბრიფინგზე ის ვიდეო წარმოადგინა, სადაც „დროანიუსის“ ჟურნალისტებსა და ია მაკასარაშვილს შორის ურთიერთშელაპარაკებაა ასახული.

„ჟურნალისტები იმყოფებოდნენ „ვარკეთილი სამის“ მეოთხე მიკრორაიონის 196–ე ბაგა–ბაღში. მათ ჩვეულებრივ გადაიღეს საარჩევნო უბანი და როდესაც გარეთ გავიდნენ, ჯიპით მიადგა „ქართული ოცნების“ მაჟორიტარობის კანდიდატი ია მაკასარაშვილი, რომელიც თანმხლებ პირებთან ერთად დაემუქრა. იმედი გვაქვს, ეს ფაქტი გახდება როგორც ცესკო–ს, ისე უწყებათაშორისი კომისიის მსჯელობის საგანი, რადგან სახეზე გვაქვს კანონმდებლობის უხეში დარღვევა“,– განაცხადა ჭიაბერაშვილმა.