ადამიანის უფლებათა ცენტრი აცხადებს, რომ სამწუხაროა ის ფაქტი, რომ ეთნიკური უმცირესობებით დასახლებულ სოფლებში კვლავ დაბალია სამოქალაქო განათლების დონე და ამომრჩევლებს არ ესმით თავიანთი უფლებები.

ამის შესახებ ორგანიზაციის ხელმძღვანელმა ალექსანდრე ცქიტიშვილმა 13:00 საათისთვის ადგილობრივი თვითმმართველობის არჩევნების მიმდინარეობის შესახებ არასამთავრობო ორგანიზაციების მედიაცენტრში გამართულ ბრიფინგზე განაცხადა:

„პრობლემური ტენდენცია გამოიკვეთა ეთნიკურად აზერბაიჯანელებით დასახლებულ სოფლებში განთავსებულ საარჩევნო უბნებზე, სადაც ამომრჩევლებსა და საარჩევნო კომისიების წარმომადგენლებს შორის კომუნიკაცია აზერბაიჯანულ ენაზე მიმდინარეობს და ეს დამკვირვებლებს ხელს უშლის, არჩევნებს დააკვირდნენ სრულფასოვნად. მსგავსი ტენდენცია შეიმჩნევა ახმეტის მუნიციპალიტეტის ეთნიკურად ჩეჩენი და ქისტი მოქალაქეებით დასახლებულ სოფლებში, პანკისის ხეობაში. ეთნიკური უმცირესობების წარმომადგენლები ხშირად ვერ ერკვევიან საარჩევნო პროცედურებში. კომისიის წევრები მათ უხსნიან ხმის მიცემის პროცედურას, მაგრამ ვინაიდან ისინი აზერბაიჯანულ ან ქისტურ ენაზე საუბრობენ, დამკვირვებლები ვერ იგებენ, ამ დროს კონკრეტულად რაზე ესაუბრებიან კომისიის წევრები ამომრჩევლებს და ხომ არ ახდენენ მათზე რაიმე სახის ზეწოლას.

მართალია, ასეთ შემთხვევებს 13:00 საათისთვის მასობრივი ხასიათი არა აქვს, მაგრამ ზოგადად, სამწუხაროა ის ფაქტი, რომ ეთნიკური უმცირესობებით დასახლებულ სოფლებში კვლავ დაბალია სამოქალაქო განათლების დონე და ამომრჩევლებს არ ესმით თავიანთი უფლებები“, – დასძინა ცქიტიშვილმა.