„ნაციონალური მოძრაობის“ წევრი გოკა გაბაშვილი მიიჩნევს, რომ ყოფილმა პრემიერმა ბიძინა ივანიშვილმა სამუშაო ადგილებთან დაკავშირებით ცინიკური კომენტარი გააკეთა.

„ძალიან საინტერესო, ცინიკური კომენტარი გააკეთა დღეს ბატონმა ივანიშვილმა სამუშაო ადგილებთან დაკავშირებით. მან ფაქტობრივად, დაადასტურა, რომ ის, და მოგეხსენებათ, ის არის ამ მთავრობის ფაქტობრივი მმართველი, არ აპირებს სამუშაო ადგილებზე ზრუნვას. მან თქვა, რომ მთავრობის საქმე არ არის სამუშაო ადგილების შექმნა. ის, რომ ბიძინა ივანიშვილი არ ეთანხმება ხალხს იმაში, რომ ამ მთავრობის მთავარი პრობლემა არის სამუშაო ადგილები, კიდევ ერთხელ აჩვენებს, რა მიდგომა აქვს მას და მის მთავრობას იმ რეალობასთან დაკავშირებით, რომელიც ქვეყანაშია“,– განაცხადა გაბაშვილმა.

ბიძინა ივანიშვილის თქმით, სამუშაო ადგილები უნდა შექმნას ბიზნესმა, ხოლო ხელისუფლებამ უნდა შექმნას შესაბამისი პირობები ბიზნეისის შექმნისთვის.

"ძირითადი პრობლემა დღევანდელი მთავრობის, რაც გამოიკვეთა არის უმუშევრობა. ამას ყველაზე დიდ შეცდომად უთვლიან ხელისუფლებას, რასაც არ ვეთანხმები. ხელისუფლებამ უნდა შექმნას პირობები, რომ შეიქმნას სამუშაო ადგილები. სამუშაო ადგილები კი უნდა შექმნას ბიზნესმა, რისთვისაც ხელისუფლებამ უნდა შექმნას სათანადო პირობები. ჩვენ უნდა მოვახერხოთ და კონკურენტული გარემო შევქმნათ, ყველას უნდა ჰქონდეს თანაბარი გარემო, რომ გააკეთოს არჩევნები", - განაცხადა ბიძინა ივანიშვილმა საარჩევნო უბანზე მისვლის დროს.