"ნაციონალური მოძრაობის" თბილისის მერობის კანდიდატმა ნიკა მელიამ ადგილობრივ არჩევნებში საკუთარი აზრი უკვე დააფიქსირა. მელამ ხმა მთაწმინდის #6 საარჩევნო უბანზე გააკეთა.

„ნაციონალური მოძრაობის“ კანდიდატმა არჩევანი უმცირესობის ერთ-ერთ წევრთან დავით საყვარელიძესთან ერთად გააკეთა.

როგორც ნიკა მელიამ ხმის მიცემის შემდეგ განაცხადა, თბილისს უნდა ჰყავდეს მერი, რომელიც იქნება ყველას მერი განურჩევლად პოლიტიკური შეხედულებებისა.

"ჩემი აზრით, ძალიან პრაგმატული და რაციონალური არჩევანი გავაკეთე. ხმა მივეცი არა დაუმთავრებელ ურთიერთდაპირისპირებას და კინკლაობას, არამედ, პირიქით, ხმა მივეცი დაპირისპირებულ ჯგუფებს შორის თანხმობის ჩამოყალიბებას, ინფრასტრუქტურული პროექტების განხორციელებას, მგზავრობის გაიაფებას, კომუნალური ხარჯების შემცირებას. დროა თბილისი და თბილისელები გათავისუფლდეს დაბოღმილი პოლიტიკისაგან. დარწმუნებული ვარ, თბილისელები გააკეთებენ ასეთ ზუსტ, ასეთ პრაგმატულ არჩევანს, ვინაიდან, ბრმად ავტორიტეტზე გაყოლა არის ის, რამაც კარგი ვერ მოგვიტანა. ამის ნათელი მაგალითი ერთი წლის თავზე ჩვენ უკვე გვაქვს", - განუცხადა ჟურნალისტებს ნიკა მელიამ.

ნიკა მელია არჩევნების მეორე ტურს თბილისში არ გამორიცხავს.