ბიძინა ივანიშვილი ვანო მაჭავარიანის გათავისუფლებას ეხმაურება

პოლიტიკა - 11:31, 15 Jun, 2014

1683

საქართველოს ყოფილი პრემიერ-მინისტრი ბიძინა ივანიშვილი ვანო მაჭავარიანის გათავისუფლების ფაქტს ეხმაურება და აცხადებს, რომ მას ამ ფაქტთან არანაირი კავშირი არ აქვს.

"არ მინდა, რომ ვანო მაჭავარიანის მრჩევლის თანამდებობიდან გათავისუფლება ვინმემ მე მომაწეროს",- განაცხადა ყოპფილმა პრემიერმა.

"პირველ რიგში, ამასთან მე არაფერი კავშირი არ მაქვს. ჩემს გამოსვლაში არ მიმინიშნებია იმაზე თუ რატომ მუშაობს ვანო მაჭავარიანი პრეზიდენტის სამსახურში. ვთვლიდი და გავიმეორებ, რომ ის არ უნდა ყოფილიყო ფავორიტი, რადგან ეს უბრალოდ პოლიტკორექტულობას არღვევდა, მეტი არაფერი. ეს ყველაფერი შესაძლებელი იყო და მე ჩემი აზრი გამოვთქვი. არ მინდა, რომ ის როგორც მოხდა და განვითარდა, ვინმემ მე მომაწეროს. მახსოვს, რომ მარგველაშვილი განათლების მინისტრი იყო და მკითხა, რომ თუ შეიძლებოდა მაჭავარიანი სამინისტროში დაესაქმებინა. მე თანხმობა მივეცი. აქედან გამომდინარე, ეს ჩემთან არ უნდა დაკავშირდეს, არსად არ იკვეთება, რომ მე გამიწია ანგარიში", - აღნიშნა ბიძინა ივანიშვილმა.

მისივე განცხადებით, ის მხოლოდ იმას ამბობდა, რომ მაჭავარიანი არ უნდა ყოფილიყო პრეზიდენტის სახე.

"მე მხოლოდ ვამბობდი იმას, რომ მაჭავარიანი არ უნდა ყოფილიყო სახე პრეზიდენტის. ამაზე გამოვთქვამდი ჩემს პოზიციას და დღესაც შემიძლია დავაფიქსირო, რომ უხერხულია, როდესაც მისი ძმა არის წინა პრეზიდენტის ფავორიტი და ახალი პრეზიდენტის ფავორიტი იქნება ვანო მაჭავარიანი. მხოლოდ ამაზე მივანიშნებდი. ადრეც ვთქვი, რომ თუნდაც მიხეილ მაჭავარიანმა იმუშაოს მარგველაშვილის ადმინისტრაციაში, ამაშიც პრობლემას ვერ ვხედავ. ჩვენ ყველა ერთი ქვეყნის მოქალაქეები ვართ და დისკრიმინაცია არ უნდა არსებობდეს, მაგრამ პოლიტკორექტულობაზე მივანიშნებდი", - აღნიშნა ივანიშვილმა.