შინაგან საქმეთა სამინისტროს განცხადებით, „ნაციონალური მოძრაობის“ მხარდამჭერების ცემის ფაქტზე გამოძიება დაიწყო, თუმცა დაშავებულები გამოძიებასთან არ თანამშრომლობენ.

აღნიშნულზე სამინისტროს საზოგადოებასთან ურთიერთობის სამსახურის უფროსმა ნინო გიორგობიანმა განაცხადა.

„შს სამინისტრომ დაუყოვნებლივ დაიწყო გამოძიება ფონიჭალაში „ერთიანი ნაციონალური მოძრაობის“ 4 წევრის ცემის ფაქტზე სისხლის სამართლის კოდექსის 125-ე მუხლით. მიმდინარეობს ყველა აუცილებელი ღონისძიება დანაშაულის ჩამდენი პირების დადგენა-დაკავების მიზნით, თუმცა აღსანიშნავია, რომ დაზარალებულები, “ერთიანი ნაციონალური მოძრაობის“ მხარდამჭერები გამოძიებასთან არ თანაშრომლობენ. შს სამინისტრო მოუწოდებს ყველას, მათ შორის – არჩევნებში ჩართულ პოლიტიკურ პარტიებს, თავი შეიკავონ პროვოკაციული ქმედებებისგან. ხაზგასმით აღვნიშნავ, რომ თითოეული დარღვევის ფაქტზე სამინისტრო ოპერატიულ რეაგირებას, კანონით დადგენილ შესაბამის ვადებში მოახდენს“, - განაცხადა გიორგობიანმა.

"ქართული ოცნების" აქტივისტების მხრიდან "ერთიანი ნაციონალური მოძრაობის" მომხრეებზე თავდასხმა წუხელ მოხდა.

ამის შესახებ სოციალური ქსელის მეშვეობით საპარლამენტო უმცირესობის წევრი ნუგზარ წიკლაური წერს.

"ქართული ოცნების" თავდასხმა ჩვენს მომხრეებზე კრწანისში",- წერს დეპუტატი და ფაქტის ამსახველ ფოტოებს აქვეყნებს.