ბრაზილიაში მიმდინარე მსოფლიოს ჩემპიონატზე გამარჯვებით დაიწყო გამოსვლა იტალიის ნაკრებმა. "სკუადრა აძურამ" D ჯგუფში უმთავრეს მეტოქე ინგლისის ნაკრებს ანგარიშით 2:1 სძლია.

აღსანიშნავია, რომ იტალიელებმა მატჩის წინ ვარჯიშზე მიღებული ტრავმის გამო გუნდის პირველი მეკარე ჯანლუიჯი ბუფონი მოისკალისეს, მის ნაცვლად კი კარში ადგილისალვატორე სირიგუმ დაიკავა.

მანაუსში, "არენა ამაზონიაზე" გამართულ შეხვედრაში ანგარიშიჩეზარე პრანდელის შეგირდებმა 35-ე წუთზე ოსტატურად გათამაშებული კუთხურის შემდეგ გახსნეს - ანდრეა პირლომ ბურთი გაატარა, დარტყმა კი უმეთვალყურეოდ მყოფმა კლაუდიო მარკიზიომ შორიდან, მაგრამ ზუსტად შეასრულა - კუთხეში დარტყმულს ჯო ჰარტი ვერ შესწვდა.

იტალიელებს ზეიმი დასრულებული არ ჰქონდათ, რომ მარცხენა ფრთაზე გაჭრილმა უეინ რუნიმ საჯარიმოში ჩააწოდა და დენიელ სტარიჯსაც ისღა დარჩენოდა, ბურთისთვის ფეხი დაეხვედრებინა.

შესვენებამდე მარიო ბალოტელიმ აანერვიულა წინ გამოსული ჰარტი, რომლის დაუცველი კარის ხაზიდან ბურთი მცველის გამოსატანი გახდა. თუმცა, მარიომ მატჩის მეორე ნახევარში თავისი მაინც გაიტანა - 50-ე წუთზე მარჯვენა ფლანგზე იტალელებმა სწრაფი შეტევა განახორციელეს. მატეო დარმიანის პასის შემდეგ ანტონიო კანდრევამ ფლანგიდან ჩაჰკიდა, შორ ძელთან კი ბურთს თავი სუპერმარიომ შეაგება და თავისიანები წინ გაიყვანა.

დარჩენილ დროში იტალიელებმა კარის უსაფრთხოებაზე დაიწყეს ზრუნვა, ინგლისელთა მცდელობას კი შედეგი არ მოჰყოლია. გამოსარჩევი ეპიზოდი ისევ ჯო ჰარტის კართან შეიქმნა, როდესაც პირლოს საჯარიმო დარტყმის შემდეგ ბურთი ხარიხას მოხვდა...

იტალიის ნაკრები შემდეგ ტურში კოსტა რიკას დაუპირისპირდება. ინგლისელებს კი საქმე გაურთულდათ - მომდევნო შეხვედრაში ურუგვაისთან მძიმე ბრძოლის გადატანა მოუწევთ.