„ხელისუფლებამ ყველაფერი იღონა აბსოლუტურად თავისუფალი, კონკურენტული საარჩევნო გარემოს უზრუნველსაყოფად“, - ამის შესახებ საქართველოს პრემიერ-მინისტრმა თბილისში ევროპის მოედანზე სიტყვით გამოსვლისას განაცხადა.

ირაკლი ღარიბაშვილმა მოსახლეობას კიდევ ერთხელ მოუწოდა არჩევნებში მონაწილეობისკენ.

"დღეს თითოეულ ამომრჩეველს აქვს სამართლიან და მშვიდ გარემოში, საკუთარი სინდისის კარნახით თავისუფალი არჩევანის გაკეთების საშუალება. ყოველგვარი ჩარევის გარეშე ახორციელებენ თავის საქმიანობას საარჩევნო ადმინისტრაცია და მისი თანამშრომლები. ხელისუფლება არ ერევა არც მათ საქმიანობაში და არც მათ გადაწყვეტილებებში. მინდა, კიდევ ერთხელ მოვუწოდო ყველას, რომ არჩევნებში თითოეული მოქალაქის, ვისი მხარდამჭერიც არ უნდა იყოს, თავისუფალი არჩევანი უნდა იყოს დაცული! არავინ ჩაერევა საარჩევნო ადმინისტრაციის საქმიანობაში! ეს არის ჩემი და მთელი ჩვენი პოლიტიკური გუნდის ურყევი ნება! სწორედ ამიტომ არის ჩვენი ხელისუფლება მართლაც დემოკრატიული და პროგრესული!", - აღნიშნა ირაკლი ღარიბაშვილმა.

მისი თქმით, არჩევნების მოახლოებასთან ერთად ვნებათაღელვა სულ უფრო მატულობს და ცალკეული შემთხვევები ჩრდილს აყენებს მთლიანად საარჩევნო პროცესს.

პრემიერის განმარტებით, არც ერთი მსგავსი ფაქტი უყურადღებოდ არ დარჩება და ყველა კანონდამრღვევი სათანადოდ დაისჯება.

"ადგილობრივი თვითმმართველობის არჩევნები კიდევ ერთი ტესტია, რომელიც ჩვენმა ქვეყანამ უნდა ჩააბაროს დემოკრატიული განვითარების გზაზე. ამიტომ, მოვუწოდებ უკლებლივ ყველას, იქნება ეს რომელიმე პოლიტიკური ძალის წარმომადგენელი თუ მისი მხარდამჭერი, არ დაუშვან ძალადობა, არ დაუშვან ისეთი ქმედება, რომელმაც შეიძლება დააზიანოს არჩევნების პროცესი და ამით იმიჯი შეულახოს ჩვენს ქვეყანას. დარწმუნებული ვარ, რომ ამჯერადაც ჩვენ მშვიდად წავალთ არჩევნებზე და ჩვენი ქვეყნის, ჩვენი შვილების მომავლის, თავისუფალი და ბედნიერი მომავლის სასარგებლოდ გავაკეთებთ არჩევანს", - განაცხადა ირაკლი ღარიბაშვილმა.