„საკუთარ კანდიდატებთან ვერ მოულაპარაკებიათ და ეს ხალხი რუსეთის ან ამერიკის პრეზიდენტებთან შეძლებენ დალაპარაკებას“, - ასე გამოეხმაურა „ბურჯანაძე-ერთიანი ოპოზიციის“ ლიდერი ნინო ბურჯანაძე „ქართული ოცნების“ პოლიტსაბჭოს გადაწყვეტილებას, რომლის მიხედვით მარნეულში მმართველი გუნდის გამგებლობის კანდიდატი უნდა მოიხსნას.

მისი თქმით, ხელისუფლების დაბალ ავტორიტეტზე მიუთითებს ის ფაქტი, რომ მერაბ თოფჩიშვილმა საკუთარი კანდიდატურა არ მოხსნა და წინასაარჩევნო კამპანია გააგრძელა.

„ხელისუფლებამ მარნეულშიც ვერ დაალაგა სიტუაცია. საქმე მიიყვანა იქამდე, რომ რამის მოსახლეობის ერთი ნაწილი მეორეს დაუპირისპირდა. შემდეგ სრულიად გაუგებრად მოხსნეს მარნნეულის „ქართული ოცნების“ კანდიდატი. ეს მიმყარებს ეჭვს, რომ ეს იყო გათამაშებული სცენარი იმისათვის, რომ „ნაციონალურმა მოძრაობამ“ შეძლოს თავისის ამომრჩევლის მობილიზაცია, თუმცა დარწმუნებული ვარ, რომ აქ მცხოვრები ხალხი „ნაციონალურ მოძრაობას“ ხმას არ მისცემენ. დღეს კიდევ უფრო მეტი საოცრება დავინახეთ. გუშინ „ქართულმა ოცნებამ“ გამოაცხადა, რომ უნდა მოხსნას თავისი კანდიდატი, დღეს კი კანდიდატი პასუხობს, რომ არ მაინტერესებს, მე ჩემს კანდიდატს არ ვხსნიო. როდესაც სახელისუფლებო ძალას საკუთარ კანდიდატთან არ აქვს იმდენი ავტორიტეტი, რომ მისი სიტყვა იყოს მნიშვნელოვანი და გადამწყვეტი ეს აჩვენებს იმ უპასუხისმგებლობას რაზეც ჩვენ ვლაპარაკობთ. საკუთარ კანდიდატებთან ვერ მოულაპარაკებიათ და ეს ხალხი ან რუსეთის პრეზიდენტთან ან ამერიკის პრეზიდენტთან შეძლებენ დალაპარაკებას? რა თქმა უნდა ვერ შეძლებენ“, - განაცხადა ნინო ბურჯანაძემ.