"ნაციონალური მოძრაობის" წევრი დავით დარჩიაშვილი პრეზიდენტის ადმინისტრაციაში მიმდინარე საკადრო ცვლილებებს ეხმაურება. როგორც „ნიუპოსტს“ დარჩიაშვილმა განუცხადა ცვილებები "მთლიანად ადმინისტრაციაშია მოსალოდნელი". მისი თქმით, აღნიშნული ფაქტი მმართველ გუნდში არსებული დაპირისპირებების გამოძახილია.

„მე როგორც ვიცი მთელ ადმინისტრაციაშია მოსალოდნელი ცვლილებები. რაღაც ქაოსი , რომ აქვთ საკუთარ გუნდში წინასაარჩევნოდ ეს ფაქტია. ასევე კარგად ჩანს გუნდში არსებული დაპირისპირებები და კონფლიქტები. ალბათ ამის გამოძახილია ეს ყველაფერი. ძალიან არაჯანსაღი შიდა ურთიერთობებია. რაც შეეხება მარგველაშვილის და სააკაშვილის უკრაინაში შეხვედრას და ის, რომ ამ შეხვედრის ორგანიზებას მაჭავარიან აბრალებდნენ, ჭორი მგონია. თვეებია ვაკვირდებით რა ურთიერთობა ჩამოყალიბდა ჩრდილოვან მმართველ ივანიშვილსა და მარგველაშვილს შორის, შემდეგ ეს გადაიზარდა მარგველაშვილ-ღარიბაშვილის კამათებში და ესე გრძელდება. მე კონკრეტულად ვერაფერს ვიწინასწარმეტყველებ მაგრამ ამ ხელისუფლებისგან არაფერი გამიკვირდება“, - განაცხადა დარჩიაშვილმა.

ცოტა ხნის წინ პრეზიდენტის ადმინისტრაცია ლაშა აბაშიძემ, მისმა ორმა მოადგილემ და ადმინისტრაციის ლოჯისტიკის ხელმძღვანელმა დატოვეს. ასევე ცოტა ხნის წინ გამოქვეყნდა პრეზიდენტის განკარგულება, რომლის მიხედვით პრეზიდენტის მრჩეველი ვანო მაჭავარიანი თანამდებობიდან გაათავისუფლდა.