რა გადაწყვეტილებას მიიღებს "ქართული ოცნების" მარნეულის გამგებლობის კანდიდატი

პოლიტიკა - 12:00, 13 Jun, 2014

1420

რა გადაწყვეტილებას მიიღებს საკუთარი კანდიდატურის მოხსნასთან დაკავშირებით კოალიცია "ქართული ოცნების" მარნეულის გამგებლობის კანდიდატი. მერაბ თოფჩიშვილს გადაწყვეტილების მისაღებად ორი დღე აქვს.

ის გუშინ, გვიან ღამით კოალიციის ოფისში მივიდა, სადაც პოლიტსაბჭოს გადაწყვეტილებასთან დაკავშირებით კონსულტაციები გამართა. ვისთან იმყოფებოდა მოლაპარაკებაზე თოფჩიშვილი, ამ დრომდე უცნობია. მას ამასთან დაკავშირებით ჟურანლსიტებთან კომენტარი არ გაუკეთებია.
თოფჩიშვილის განცხადებით, ის გადაწყვეტილებას უახლოეს პერიოდში მიიღებს.

გვიან ღამით ხმაური იყო "ქართული ოცნების" ოფისთან, სადაც მერაბ თოფჩიშვილის მხარდამჭერები შეიკრიბნენ, რომლებმაც პოლიტსაბჭოს გადაწყვეტილება გააპროტესტეს. მათი განცხადებით, გადაწყვეტილება მათთვის მიუღებელია. ისინი ფართომასშტაბიანი აქციებით იმუქრებიან.

კოალიცია "ქართულმა ოცნებამ" მარნეულში საკუთარი გამგებლობის კანდიდატი მერაბ თოფჩიშვილი გუშინ მოხსნა. გადაწყვეტილება პოლიტსაბჭოს სხდომაზე მიიღეს. როგორც კოალიციის სპეციალურ განცხადებაშია ნათქვამი, კოალიცია საკუთარ კანდიდატს ურჩევს მიიღოს გადაწყვეტილება - არჩევნებიდან მოხსნას საკუთარი კანდიდატურა ეთნიკურად აზერბაიჯანელი 2 კანდიდატის სასარგებლოდ.

კოალიციის ინფორმაციით, აღნიშნული გადაწყვეტილება შექმნილი რეალობიდან გამომდინარე მიიღეს, რათა თავიდან იყოს არიდებული ოპოზიციური პარტიების მიერ ეთნიკურ ნიადაგზე დაპირისპირების პროვოცირება.
“ჩვენ ვარღვევთ წლების განმავლობაში დამკვიდრებულ მანკიერ პრაქტიკას, როდესაც, როგორც წესი, მარნეულში ხელისუფლება ამომრჩეველს თავს ახვევდა საკუთარ კანდიდატს და ყოველთვის იმარჯვებდა სახელისუფლებო კანდიდატი. იმის ნიშნად, რომ ჩვენი ხელისუფლებისთვის მთავარია სახელმწიფოს ინტერესები, საზოგადოებრივი თანხმობა და ქვეყანაში პოლიტიკური კულტურის ამაღლება, ვქმნით პრეცედენტს, როდესაც ხელისუფლება თავად ხსნის თავის კანდიდატურას ოპოზიციური კანდიდატების სასარგებლოდ", - ნათქვამია განცხადებაში.

მარნეულში "ქართული ოცნების" კანდიდატურის მოხსნას უპრეცედენტოს უწოდებს ვიცე-პრემიერი. კახა კალაძის თქმით, კოალიციამ მიიღო მნიშვნელოვანი გადაწყვეტილება, როდესაც მარნეულში საკუთარი კანდიდატურა მოხსნა, რადგან გარკვეული ოპოზიციური ძალები ეთნიკურ ნიადაგზე დაპირისპირების პროვოცირებას ცდილობდნენ.
ვიცე-პრემიერის განმარტებით, "ქართულმა ოცნებამ" კიდევ ერთხელ დაამტკიცა, რომ კოალიციის მიზანი დემოკრატიული სახელმწიფოს მშენებლობაა.