საქართველოს პრემიერმინისტრმა ირაკლი ღარიბაშვილმა სასტუმრო „რადისონში“ საქართველო-ევროკავშირის საერთაშორისო ინვესტორთა კონფერენციაზე სიტყვით გამოსვლისას განაცხადა, რომ „ევროპული იდეა ეკუთვნის თითოეულ ჩვენგანს, ჩვენ ვართ, ვიყავით და ვიქნებით ევროპელები“:

"ჩემთვის ძალიან სასიხარულოა, რომ თბილისი მასპინძლობს ინვესტორთა საერთაშორისო კონფერენციას. კონფერენცია საქართველოსა და ევროკავშირის ერთობლივი ძალისხმევით ტარდება და ასახავს ჩვენს საერთო ინტერესს, რომ მაქსიმალურად გამოვიყენოთ ახალი შესაძლებლობები, რომლებიც თანამშრომლობის გაღრმავებით მოგვეცა. დღევანდელი კონფერენცია განსაკუთრებულია იმიტომაც, რომ ევროკავშირთან ასოცირების ისტორიული პროცესის საწყის ეტაპზე ასეთი მნიშვნელოვანი ღონისძიება პირველად იმართება რეგიონში. საქართველო ყოველთვის იყო ევროპული ცივილიზაციის, მისი გეოგრაფიული, კულტურული და ისტორიული სივრცის შემადგენელი ნაწილი და ამას, პირველ რიგში, საერთო ღირებულებები განაპირობებდა. საქართველოს ისტორია ამ ღირებულებათა დაცვისთვის ბრძოლის ისტორიაა. მაშინაც კი, როდესაც ქვეყანას დროებით დაკარგული ჰქონდა დამოუკიდებლობა და სახელმწიფოებრიობა, საქართველოს არ გაუწყვეტია კავშირი ევროპულ იდეალებთან, ღირებულებებთან, კულტურასთან. მოვლენათა ისტორიულმა განვითარებამ ქართველი ხალხის ევროპული არჩევანი ოცნებად და ისტორიულ მიზნად აქცია.

მიუხედავად ამისა, ქვეყანა განაგრძობს წინსვლას ევროპული მომავლისაკენ, ვინაიდან ისტორიული არჩევანი - ევროპული ღირებულებებისადმი ერთგულება არის ის საფუძველი, რომელმაც საქართველოს ევროინტეგრაციის პროცესი შეუქცევადი გახადა. საქართველოს ევროპული იდეა ეკუთვნის თითოეულ ჩვენგანს. ჩვენ ვართ, ვიყავით და ვიქნებით ევროპელები. ევროპელობა ჩვენი ეროვნული იდენტურობის ნიშანია და არის ის ღირებულება, რომლისთვისაც იბრძოდა საქართველოს ხალხის მრავალი თაობა. ამდენად, ევროპული ინტეგრაცია ბუნებრივი პროცესია საქართველოსთვის და ქართველი ხალხისთვის", - განაცხადა პრემიერ-მინისტრმა.