კოალიცია „ქართული ოცნების“ პოლიტსაბჭომ მარნეულის გამგებლობის კანდიდატის მერაბ თოფჩიშვილის მოხსნის გადაწყვეტილება მიიღო, თუმცა, ცესკოში განმარტავენ, რომ თოფჩიშვილი კანდიდატად კვლავ რჩება, რადგან კანდიდატების მოხსნის ვადები ამოწურულია:

"საჯარო განცხადებები, რა თქმა უნდა, შესაძლებელია რომ გაკეთდეს კანდიდატურის მოხსნასთან დაკავშირებით, თუმცა ეს გავლენას ვეღარ მოახდენს ბიულეტენში არსებულ ჩამონათვალზე. შესაბამისად, ყველა ასეთი საჯარო განცხადების მიუხედავად, მაინც დარჩებიან კანდიდატები საარჩევნო ბიულეტენებში და საარჩევნო კომისია დაითვლის მათ ხმებსაც, როგორც ყველა დანარჩენის შემთხვევაში", - აცხადებს ცესკო-ს სპიკერი ეკა აზარაშვილი.

"ქართულმა ოცნებამ" მარნეულში ოპოზიციის კანდიდატის სასარგებლოდ საკუთარი კანდიდატურა მოხსნა.

"კოალიცია ,,ქართული ოცნების" პოლიტსაბჭომ იმსჯელა და მარნეულში შექმნილი რეალობიდან გამომდინარე, იმისათვის, რომ ოპოზიციურმა პარტიებმა ვერ მოახერხონ ეთნიკურ ნიადაგზე დაპირისპირების პროვოცირება, აგრეთვე თავიდან იქნეს აცილებული დამატებით სიტუაციის ესკალაცია, მიიღო გადაწყვეტილება ურჩიოს მარნეულის ,,ქართული ოცნების" კანდიდატს, მოხსნას არჩევნებიდან საკუთარი კანდიდატურა ეთნიკურად აზერბაიჯანელი 2 ოპოზიციური კანდიდატის სასარგებლოდ", - ნათქვამია განცხადებაში.