პრეზიდენტი - ჩვენ ვისაუბრეთ იმ ძალიან შთამბეჭდავ გზაზე, რომელიც განნვვლეთ ვილნიუსის სამიტიდან

პოლიტიკა - 21:14, 12 Jun, 2014

1235

ჩვენ ვისაუბრეთ იმ ძალიან შთამბეჭდავ გზაზე, რომელიც განნვვლეთ ვილნიუსის სამიტიდან, - ამის შესახებ საქართველოს პრეზიდენტმა, გიორგი მარგველაშვილმა ევროკომიის პრეზიდენტ, ჟოზე მანუელ ბაროზოსთან შეხვედრის შემდეგ გამართულ ერთობლივ პრესკონფერენციაზე განაცხადა.

მისი თქმით, საქართველო 27 ივნისს ხელს მოაწერს ასოცირების ხელშეკრულებას ღრმა და ყოვლისმომცველი თავისუფალი ვაჭრობის ჩათვლით და ამ მომენტიდან იწყება უმნიშვნელოვანესი, ახალი ეტაპი ჩვენი ქვეყნის ისტორიაში.

"ეს იქნება მნიშვნელოვანი ეტაპი, რომლისთვისაც გაერთიანებული არის არა მხოლოდ სახელისუფლებო გუნდი, არამედ მთელი ქართული საზოგადოება. ეს არის გადაწყვეტილება, რომლის ერთგულიც ვართ არა მარტო დღევანდელი ქართველები, არამედ, რომლის ერთგულიც იყვნენ ჩვენი წინაპრებიც, როდესაც ევროპულ არჩევანს ახორციელებდნენ", -განაცხადა პრეზიდენტმა.

მისი თქმით, ხვალ გაიმართება კონფერენცია ინვესტირების საკითხებთან დაკავშირებით და ამ კონფერენციაზე დასასწრებად ჩამოსულია შთამბეჭდავი დელეგაცია.

"ისინი კონკრეტული ეკონომიკური პროექტების ჭრილში განიხილავენ ჩვენს მომავალ თანამშრომლობას. მე მინდა ხაზი გავუსვა იმას, რომ ახალი სავაჭრო ხელშეკრულების ფარგლებში საქართველოს ეკონომიკას მიეცემა ძალიან საინტერესო, ახალი სტიმული. საქართველოს ეკონომიკისთვის გაიხსნება უმნიშვნელოვანესი ევროპული ბაზარი. ასოცირების ხელშეკრულება ეს არის ძალიან მნიშვნელოვანი, მიღწეული ახალი ეტაპი, მაგრამ ჩვენთვის, ქართული პოლიტიკური სპექტრისთვის, საზოგადოებისთვის ეს არის ახალი ეტაპის დასაწყისი. ჩვენ ვგეგმავთ და ვახორციელებთ პოლიტიკას, რომელიც მიმართულია ევროკავშირის წევრობისკენ და ეს იქნება ის არჩევანი, რომელსაც ჩვენ მომავალში ერთად განვახორციელებთ", - განაცხადა მარგველაშვილმა