საქართველოს პრეზიდენტი გიორგი მარგველაშვილი ევროკომისიის პრეზიდენტ ჟოზე მანუელ ბაროზუს პირისპირ შეხვდა.

პრეზიდენტის ადმინიტრაციის ინფორმციით, მხარეებმა საქართველო-ევროკავშირის თანამშრომლობის პრიორიტეტული საკითხები განიხილეს და ყურადღება ევროკავშირთან ასოცირების ხელშეკრულების ხელმოწერისა და შემდგომი სამოქმედო გეგმის დეტალებზე გაამახვილეს.

„საუბარი შეეხო პოლიტიკურ და ეკონომიკურ თემებს, მათ შორის ასოცირების ხელშეკრულების ფარგლებში, ევროკავშირთან ღრმა და ყოვლისმომცველი თავისუფალი ვაჭრობის შეთანხმებას. როგორც გიორგი მარგველაშვილმა აღნიშნა, ჟოზე-მანუელ ბაროზოს ვიზიტს უაღრესად დიდი მნიშვნელობა აქვს განსაკუთრებით იმ პერიოდში, როდესაც ახლოვდება ასოცირების ხელშეკრულების ხელმოწერა. ასევე გიორგი მარგველაშვილმა და ჟოზე-მანუელ ბაროზომ რეგიონური უსაფრთხოების საკითხებზე ისაუბრეს და საქართველო-რუსეთის ურთიერთობაზეც იმსჯელეს. ყურადღება მათ ოკუპირებულ ტერიტორიებზე არსებულ ვითარებასა და ამ რეგიონებში ადამიანთა უფლებების დარღვევის ფაქტებზე გაამახვილეს. როგორც ქვეყნის პირველმა პირმა შეხვედრისას აღნიშნა, საქართველო კვლავაც განაგრძობს დემოკრატიული რეფორმების განხორციელებას და იმედი გამოთქვა, რომ ნაკისრი ვალდებულებების შესრულება სათანადოდ აისახება ქვეყნის ევროპული ინტეგრაციის პროცესზე. გიორგი მარგველაშვილმა ჟოზე-მანუელ ბაროზოს მადლობა გადაუხადა ევროკავშირის ურყევი მხარდაჭერისთვის, როგორც ქვეყნის ტერიტორიული მთლიანობის მხრივ, ისე ევროინტეგრაციის თვალსაზრისით“,- აღნიშნულია პრეზიდენტის ადმინიტრაციის მიერ გავრცელებულ განცხადებაში.

მათივე ინფორმაციით, შეხვედრა გაფართოებული შემადგენლობით გაგრძელდა და მას ქართული მხრიდან ეროვნული უშიშროების საბჭოს მდივანი ირინე იმერლიშვილი, პრეზიდენტის მრჩეველი დავით პატარაია, პარლამენტის წევრი თედო ჯაფარიძე და ბელგიის სამეფოსა და ევროკავშირში საქართველოს ელჩი ნატა საბანაძე ესწრებოდნენ.