„საქართველოს ბანკის“ გენერალური დირექტორი ირაკლი გილაური აცხადებს, რომ საქართველოს ეროვნული ბანკის პრეზიდენტმა გიორგი ქადაგიძემ საბანკო სექტორის წარმომადგენლებთან იმის შესახებ ისაუბრა, რომ მათ სააკრედიტო ბარათების გაცემისას რისკები არ გაეპაროთ და ფხიზლად იყვნენ.

„დღევანდელი დისკუსია, რაც ეროვნულმა ბანკმა დაიწყო, მნიშვნელოვანია, რათა ბანკები ამ სექტორში რისკებს დააკვირდნენ. ეს დიალოგი ეროვნულ ბანკთან ყოველთვის არის. ჩვენ უნდა ვიყოთ ფრთხილად, რომ რისკები არ გაგვეპაროს. არ ვიცი, ეროვნული ბანკი დამატებით რეგულაციებს თუ მიმართავს, მაგრამ დიალოგი საცალო აკრედიტების კუთხით რისკებთან მიმართებაში ჯანსაღია“-განაცხადა გილაურმა.

მისივე თქმით, „სესხების გაცემისას 100%-ით ბანკი შეიძლება, მართალი არ იყოს“.

"100%-ით ჩვენ მართლები რომ ვიყოთ, მაშინ ჩვენ ბანკირები აღარ ვიქნებით. ბუნებრივია, არ შეიძლება, რომ ბანკებმა ყველა სესხი სწორად გასცენ. გარდა ამისა, მინდა, აღვნიშნო, რომ გარემოებები იცვლება, ადამიანმა შეიძლება, სამსახური და შემოსავალი დაკარგოს, თუმცა მსგავსი შემთხვევების წილი მთლიან გაცემულ სესხებში ძალიან მცირეა და 2%-ზე ნაკლებს შეადგენს“ - განაცხადა გილაურმა.