ზურაბ ჯაფარიძე - საქსტატის მონაცემებით ეკონომიკური მაჩვენებლები შემცირებულია

პოლიტიკა - 14:17, 12 Jun, 2014

1190

"ერთიანი ნაციონალური მოძრაობის" განცხადებით, ეკონომიკური მაჩვენებლები შემცირებულია. 2013-2014 წლების მონაცემები დეპუტატმა ზურაბ ჯაფარიძემ წარადგინა და განმარტა, რომ ის "საქსტატის" მიერ გამოქვეყნებულ ინფორმაციას და ციფრებს ეყრდნობა.

ჯაფარიძემ დღეს გამართულ პრესკონფერენციაზე ეკონომიკის ცალკეული სფეროების შემდეგ მაჩვენებლებზე ისაუბრა: მშენებლობაში დასაქმებულთა რაოდენობა 2013 წლის მე-4 კვარტალში წინა წლის შესაბამის პერიოდთან შედარებით 14,313-ით შემცირდა, ხოლო 2014 წლის პირველ კვარტალში 2012 წლის შესაბამის პერიოდთან შედარებით დასაქმებულთა რაოდენობა 4,221-ით შემცირდა; მთლიანი ბრუნვა მშენებლობაში 2013 წლის მე-4 კვარტალში წინა წლის შესაბამის პერიოდთან შედარებით 230.5 მილიონი ლარით შემცირდა, ხოლო 2014 წლის პირველ კვარტალში 2012 წლის შესაბამის პერიოდთან შედარებით მთლიანი ბრუნვა შემცირდა 65.2 მილიონი ლარით; ასევე მშენებლობაში 2013 წლის მე-4 კვარტალში წინა წლის შესაბამის პერიოდთან შედარებით პროდუქციის გამოშვება შემცირდა 237.2 მილიონი ლარით, ხოლო 2014 წლის პირველ კვარტალში 2012 წლის შესაბამის პერიოდთან შედარებით პროდუქციის გამოშვება შემცირდა 18 მილიონი ლარით.

მისივე თქმით, 2014 წლის პირველ კვარტალში 2012 წლის შესაბამის პერიოდთან შედარებით მრეწველობაში დასაქმებულთა რაოდენობა შემცირდა 898–ით, ხოლო 2013 წლის შესაბამის პერიოდთან შედარებით – 4 ათას 111–ით.

სოფლის მეურნეობის სექტორთან დაკავშირებით ჯაფარიძემ განაცხადა, რომ 2013 წელს 2012 წელთან შედარებით ბოსტნეულის წარმოება შემცირდა 3 ათასი ტონით, ხორბლის წარმოება - 3 ათასი ტონით, ხორცის წარმოება - 100 ტონით, კვერცხის წარმოება - 12 მილიონი ცალით, რძის წარმოება - 7 მილიონი ლიტრით.

"ეს ციფრები კიდევ ერთხელ ადასტურებს იმას, რომ საქართველოს ეკონომიკა არის გაჩერებული და ის მიდგომები და პროგრამები, რასაც ხელისუფლება ანხორციელებს არის მხოლოდ ზიანის მომტანი", - განაცხადა ზურაბ ჯაფარიძემ.