სომეხთა სამოციქულო მართლმადიდებელი ეპარქია ქსენოფობიურ დამოკიდებულებაზე პრესკონფერენციას გამართავს

პოლიტიკა - 13:27, 12 Jun, 2014

618

სომეხთა სამოციქულო მართლმადიდებელი წმიდა ეკლესიის საქართველოს ეპარქიაში, 2014 წლის 12 ივნისს, 13:00 საათზე პრესკონფერენცია გაიმართება, რომელიც საქართველოს მართლმადიდებელი ეკლესიის ზოგიერთი სასულიერო პირის მხრიდან სომეხთა სამოციქულო და სხვა ქრისტიანული ეკლესიების მრევლის მიმართ გამოხატული ქსენოფობიური დამოკიდებულების საკითხს მიეძღვნება.

აღნიშნულ ინფორმაციას ლევონ ისახანიანი ავრცელებს.
"გუშინ სომეხთა ეკლესიის მრევლის წარმომადგენლის 10 წლის შვილს, რომელიც ექსკურსიაში იმყოფებოდა და მართლმადიდებლურ ტაძარში შევიდა, სადაც სხვების მსგავსად, სანთელი აანთო და პირჯვარი გადაიწერა, იქვე მყოფი სასულიერო პირის მხრიდან შენიშვნა მოჰყვა. სასულიერო პირმა ბავშვს განუცხადა, რომ ის პირჯვარს არასწორად იწერდა, ხოლო მას შემდეგ, რაც გოგონას პასუხი მოისმინა - სომხურ ეკლესიაში დავდივარ და იქ ასე მასწავლესო, მას ტაძრის დატოვება მოსთხოვა და განუცხადა, რომ ისინი, ვინც სომხურ ეკლესიაში დადიან, „შორს დგანან ღმერთისგან“ და მათ არა აქვთ უფლება, იარონ ქართულ ეკლესიებში.

რამოდენიმე დღის წინ ბათუმში მცხოვრები სომეხთა ეკლესიის სხვა მრევლსაც უარი ეთქვა მართლმადიდებელი სასულიერო პირის მხრიდან",- აცხადებს ლევონ ისახანიანი.