ზურაბ ჯაბარიძე -პრემიერის განცხადებები ,საერთო ჯამში დეოკუპაციის პოლიტიკის ეროზიას მოახდენს

პოლიტიკა - 12:14, 12 Jun, 2014

1248

"ერთიანი ნაციონალური მოძრაობის" ერთ-ერთი ლიდერის, ზურაბ ჯაფარიძის შეფასებით, პრემიერ-მინისტრის მიერ გაკეთებული განცხადებები , საბოლოო ჯამში, დეოკუპაციის პოლიტიკის ეროზიას მოახდენს და ძალიან ცუდად აისახება ქვეყნის ეროვნულ ინტერესებში.

როგორც ჯაფარიძემ ჟურნალისტებთან საუბრისას განაცხადა, ბი-ბი-სის ეთერში პრემიერ-მინისტრ ირაკლი ღარიბაშვილის მხრიდან გაკეთებული შეფასებები არის სულ მცირე, არაკომპეტენტურობის და მოვლენების არასწორად აღქმის გამოვლინება.

"ის, რომ ყირიმში განვითარებული მოვლენების საქართველოს ოკუპირებულ რეგიონებში გამეორების საფრთხე არსებობს, ამაზე საუბრობს არა მხოლოდ "ნაციონალური მოძრაობა", არამედ ბევრი ექსპერტი. საფრთხეები რეალურია და ის კიდევ უფრო მეტად გაიზარდა მას შემდეგ, რაც აფხაზეთში დე ფაქტო ხელისუფლების ცვლილება მოხდა. როდესაც პრემიერი საერთაშორისო მედიასთან ამბობს, რომ რუსეთთან პრობლემა არ აქვს და მიაღწია კარგ ბალანსს, ეს სულ მცირე არის არაკომპეტენტურობა და მოვლენების არასწორად აღქმა", - განუცხადა ჟურნალისტებს ზურაბ ჯაფარიძემ.

საქართველოს პრემიერ-მინისტრმა ირაკლი ღარიბაშვილმა BBC World-სთვის მიცემულ ინტერვიუში განაცხადა, რომ ე.წ. სამხრეთ ოსეთსა და აფხაზეთში შექმნილი ვითარების შედარება ყირიმის სიტუაციასთან დიდი შეცდომა იქნებოდა. რუსეთი არ არის დაინტერესებული ამ ორი დე-ფაქტო ტერიტორიის ანექსიით.