ინფრასტრუქტურის სამინისტროში ახალ თვითმმართველ ქალაქებში გაწეული სამუშაოების ანგარიში წარადგინეს

პოლიტიკა - 12:03, 12 Jun, 2014

283

ინფრასტრუქტურის სამინისტროში ახალ თვითმმართველ ქალაქებში გაწეული სამუშაოების ანგარიში წარადგინეს.

მინისტრის მოადგილემ თენგიზ შერგელაშვილმა ახლადშექმნილ მუნიციპალიტეტებს შორის ქონებისა და ვალდებულებების გადანაწილების წესის შესახებ ისაუბრა, რომელიც მთავრობამ 30 მაისს დაამტკიცა.

როგორც შერგელაშვილმა ჟურნალისტებთან საუბრისას განაცხადა, აღნიშნული წესის შესაბამისად, სამინისტრო გასაუქმებელი მუნიციპალიტეტების საკრებულოებს მეთოდურ დახმარებას უწევს მათი უფლებამონაცვლე მუნიციპალიტეტებისთვის აუცილებელი ნორმატიული ბაზის მომზადებასა და ქონების გამიჯვნაში.

„ამ მიზნით გასაუქმებელ მუნიციპალიტეტებში განხორციელდა ქონების ინვენტარიზაცია და საკრებულოების დროებითმა სამუშაო ჯგუფებმა ქონების გამიჯვნის განკარგულებათა პროექტების მოსამზადებელი სამუშაოები ჩაატარეს. ამ სამუშაოების ფარგლებში ტერიტორიული პრინციპით თანაბრად გაიყო მუნიციპალიტეტების საკუთრებაში არსებული ქონება, ავტოსატრანსპორტო საშუალებები, ინვენტარი და სხვა ქონება. კოდექსით დადგენილი მოხელეთა ზღვრული საშტატო რიცხოვნების შესაბამისი პროპორციით. ასევე, მომავალ თვითმართველ ქალაქებსა და თემებს შორის გადანაწილდა მუნიციპალიტეტების მიერ დაფუძნებული არასამეწარმეო იურიდიული პირები და შპს-ები, სადაც მუნიციპალიტეტები 100%-იან წილს ფლობდნენ“, - განაცხადა შერგელაშვილმა.

მისივე განაცხადებით, მთავრობამ უკვე დაამტკიცა „ახალი მუნიციპალიტეტების ბიუჯეტები შედგენის, საბიუჯეტო შემოსულობებისა და გადასახდელების 2014 წლის ბოლომდე პერიოდისთვის გადანაწილების დროებითი წესი“.

ამ წესის შესაბამისად, სამინისტრო მეთოდურ დახმარებას უწევს დასაუქმებელ მუნიციპალიტეტებს მათი ლიკვიდაციის პროცესში არსებული დოკუმენტაციის დაარქივებისა და მოქმედი დოკუმენტაციის გაყოფაში.

„მუნიციპალიტეტებში, რომლებიც იყოფა ქალაქებად და სათემო მუნიციპალიტეტებად, ჩასატარებელია ძალიან ბევრი სამუშაო, მათ შორის, მთავრობამ მიიღო ქონებისა და ვალდებულებების გამიჯვნის წესი. ასევე ბიუჯეტის გამიჯვნის წესი წლის ბოლომდე პერიოდისთვის, გარდამავალ პერიოდში. განსაზღვრული წესების შესაბამისად, მიმდინარეობს შესაბამისი თანამშრომლობა მუნიციპალიტეტებთან, რათა მათ არჩევნების შედეგების ძალაში შესვლამდე ჩაატარონ გარკვეული სამუშაოები, რომ ახალმა საკრებულოებმა დაიწყონ მუშაობა და არ იყოს ჩავარდნა, რომელიმე მომსახურების გაწევაში“, - აღნიშნა შერგელაშვილმა.