დავით ზალკალიანი -ოკუპირებული აფხაზეთის და სამხრეთ ოსეთის რეგიონებს აღიარების პერსპექტივა არ აქვთ

პოლიტიკა - 13:41, 11 Jun, 2014

1341

საქართველოს საგარეო საქმეთა მინისტრის პირველი მოადგილე, დავით ზალკალიანი დარწმუნებულია, რომ ოკუპირებული აფხაზეთის და სამხრეთ ოსეთის რეგიონებს დამოუკიდებელ სახელმწიფოებად აღიარების პერსპექტივა არ აქვთ.

ამის შესახებ დავით ზალკალიანმა ჟურნალისტებს აფხაზეთში ერითრიის დელეეგაციის ვიზიტთან დაკავშირებით განუცხადა.

კითხვაზე, ხომ არ არის საფრთხე მათაც აღიარონ დე ფაქტო აფხაზეთის დამოუკიდებლობა, ზალკალიანმა განაცხადა, რომ პროცესებს აკონტროლებენ.

"ჩვენ ამ პროცესებს ვაკონტროლებთ, ჩვენთვის ცნობილი იყო, რომ აფხაზეთში მათი ჩასვლა იყო დაგეგმილი, გამომდინარე იქედან, რომ ერითრიის დელეგაციას ჰქონდა მანამდე შეხვედრა რუსეთის საგარეო საქმეთა სამინისტროში. ერითრიას აქვს ძალიან სერიოზული, მწვავე პრობლემები სანქციებთან დაკავშირებით, ასევე ეკონომიკური პრობლემები და ცდილობენ ეს აიცილონ თავიდან", - განაცხადა დავით ზალკალიანმა.

მისივე თქმით, საგარეო უწყება ამ პროცესებს აკვირდება და მომავალშიც გააგრძელებს დაკვირვებას ევროპელ პარტნიორებთან იმისათვის, რომ არ მოხდეს აღიარების პროცესი.

"უფრო მეტიც, ჩვენ შეჩერებული გვაქვს აღიარების პროცესი, თუკი 2012 წლის ოქტომბრამდე ხუთ ქვეყანას ჰქონდა აღიარებული ე.წ. აფხაზეთის და სამხრეთ ოსეთის დამოუკიდებლობა, ორმა ქვეყანამ უკან წაიღო და ეს პროცესი შენელდა. მინდა დავარწმუნო ყველა, რომ ამ რეგიონებს აღიარების პერსპექტივა არ აქვთ", - განაცხადა დავით ზალკალიანმა.

ოკუპირებულ აფხაზეთში გუშინ, პირველად ერიტრეას დელეგაცია ჩავიდა. აფხაზეთის ე.წ. საგარეო საქმეთა სამინისტროს ინფორმაციით, სოხუმში იმყოფებოდა ერიტრეას ელჩი რუსეთის ფედერაციაში ტეკლაია მინასიე ასგედომი და ერიტრეას საგარეო საქმეთა სამინისტროს აზიისა და წყნარი ოკეანის რეგიონის დეპარტამენტის ხელმძღვანელი კალეკრისტოს გებრეიეზუსი. ისინი ოკუპირებული რეგიონის დე ფაქტო საგარეო საქმეთა მინისტრ, ვიაჩისლავ ჩირიკბას შეხვდნენ. ჩირიკბამ მზადყოფნა გამოთქვა, აფხაზეთში ერიტრეას საგარეო საქმეთა მინისტრს უმასპინძლოს.

ერიტრეა არის სახელმწიფო ჩრდილო-აღმოსავლეთ აფრიკაში, რომელმაც დამოუკიდებლობა 1993 წელს მოიპოვა.

2012 წლის 24 თებერვალს საქართველოსა და ერიტრეას შორის დიპლომატიური ურთიერთობები დამყარდა. ხელმოწერილი ოქმში აღნიშნულია ერთმანეთთან ურთიერთობებში ტერიტორიული მთლიანობის პატივისცემის პრინციპის შესახებ.