აფხაზეთის ა/რ მთავრობის ინიციატივით „აფხაზეთის სოციალური სოლიდარობის ფონდი“ შეიქმნა

პოლიტიკა - 19:30, 10 Jun, 2014

2034

აფხაზეთის ავტონომიური რესპუბლიკის მთავრობის ინიციატივით, 10 ივნისს მთავრობის საკონფერენციო დარბაზში „აფხაზეთის სოციალური სოლიდარობის ფონდის“ პრეზენტაცია გაიმართა. პრეზენტაციას აფხაზეთის მთავრობის თავმჯდომარის მოვალეობის შემსრულებელი ვახტანგ ყოლბაია, აფხაზეთის მთავრობის წევრები და აფხაზეთის უმაღლესი საბჭოს დეპუტატები დაესწრნენ.

ფონდის გამგეობის თანათავმჯდომარეები პარლამენტარი გოგი ქავთარაძე და პროფესორი ოთარ ბენიძე იქნებიან, დირექტორი კი ირაკლი თადუმაძე იქნება.

როგორც ,,ნიუპოსტს" აფხაზეთის ა/რ მთავრობის პრესსამსახურიდან აცნობეს, ფონდის საქმიანობის მთავარი მიზანია აფხაზეთიდან დევნილი მოსახლეობის ჯანდაცვისა და სოციალური პირობების გაუმჯობესება, დევნილი მოზარდების ქვეყნის ფარგლებს გარეთ განათლების მიღებისა და კვალიფიკაციის ამაღლების, კულტურისა და ხელოვნების სფეროში მოღვაწე, განსაკუთრებული ნიჭის მქონე დევნილი პირების შემოქმედების წარმოჩენის ხელშეწყობა. თავისი მიზნებიდან გამომდინარე, ფონდი იმოქმედებს საქართველოს მთელ ტერიტორიაზე, ასევე მის ფარგლებს გარეთ.

ფონდის მიზნებზე ვრცლად ისაუბრა აფხაზეთის მთავრობის თავმჯდომარის მოვალეობის შემსრულებელმა ვახტანგ ყოლბაიამ. მისი თქმით, ყოველთვიურად, ნებაყოფლობით, ფონდში გადაირიცხება აფხაზეთის მინისტრებისა და მათი მოადგილეების ხელფასების 10-15%.