გიგი უგულავა - წინასაარჩევნოდ სახელმწიფო არის მოძალადე

პოლიტიკა - 17:56, 10 Jun, 2014

651

წინასაარჩევნოდ სახელმწიფო არის მოძალადე და ყოველნაირი ძალადობის მაპროვოცირებელი, - ამის შესახებ "ნაციონალური მოძრაობის" თბილისის ორგანიზაციის ხელმძღვანელმა გიგი უგულავამ დღეს საქალაქო სასამართლოში ჟურნალისტებთან საუბრისას განაცხადა.

გიგი უგულავამ კომენტარი გააკეთა NDI-ს კვლევის დასკვნასთან დაკავშირებით, რომელიც წინასაარჩევნო პროცესებს ეხება.

"ჩვენ ვხედავთ, რომ წინასაარჩევნო ფონი ძალიან დამძიმდა. ვხედავთ ძალადობას, ვხედავთ იმას, რომ ყოველ საღამოს გამოდის ვინმე გეგეჭკორი და საუბრობს იმაზე, რომ ემიჯნებიან ძალადობას, შემდეგ ამას, როგორც წესი იმეორებს კახა კალაძე და დრო გამოშვებით ამას ღარიბაშვილიც იმეორებს ხოლმე. მაგრამ ფაქტი უტყუარია, მონაწილე ამ ძალადობაში არის არა ის, ვინც უნდათ, რომ გაასაღონ, გამწარებული ხალხი, არამედ მონაწილე, ბათუმის შემთხვევაში არის ერმაკოვის შტაბი და მასში მომუშავე ხალხი, ცაგერის შემთხვევაში "ქართული ოცნების" საარჩევნო სიის შემადგენელი ნაწილი. 8 ქალაქში ერთდოულად ორკესტრირებულად ხდება თავდასხმა. ანუ ჩვენ კარგად ვხედავთ, რომ სახელმწიფო არის მოძალადე და ყველანაირი ძალადობის მაპროვოცირებელი წინასაარჩევნოდ და ეს ძალადობა ერთადერთი მიმართულია "ნაცმოძრაობის" წინააღმდეგ", - აღნიშნა გიგი უგულავამ.

მისივე თქმით, ეს გასაგებიცაა, რადგან "ნაციონალური მოძრაობა" არის რეალური ოპოზიცია და რეალური ალტერნატივა, რომელიც დაამარცხებს თვითმმართველობის არჩევნებში "ქართულ ოცნებას".

გიგი უგულავა ასევე მარნეულში აჰმედ იმამყულიევის კანდიდატურის აღდგენის ფაქტსაც გამოეხმაურა და აღნიშნა, რომ არნახული დანაშაული და მარაზმი იქნებოდა, რომ არჩევნებამდე 5 დღით ადრე სუს-ის მიერ დაქვემდებარებული "ენჯეოს" ადვოკატის განცხადების საფუძველზე კანდიდატი თვითმმართველობის არჩევნებში მონაწილეობის გარეშე დარჩენილიყო. უგულავას განცხადებით, მარნეულში აჰმედ იმამყულიევს გამარჯვების რეალური შანსი აქვს. მისივე თქმით, ქვეყანაში უნდა ჩატარდეს თავისუფალი არჩევნები და უნდა იყოს ისეთი გარემო, რომ გამარჯვების შემთხვევაში ერთმა კანდიდატმა მეორეს მიულოცოს გამარჯვება. "მხოლოდ ასეთ შემთხვევაში აშენდება ქვეყანაში ინსტიტუციები", - აღნიშნა გიგი უგულავამ.