გიგი უგულავას საქმის განხილვა საქალაქო სასამრთლოში პროკურორების გამოუცხადებლობის გამო გადაიდო

პოლიტიკა - 17:04, 10 Jun, 2014

1431

გიგი უგულავას საქმის განხილვა საქალაქო სასამრთლოში პროკურორების გამოუცხადებლობის გამო კიდევ ერთხელ გადაიდო.

საქალაქო სასამართლოში გიგი უგულავსა საქმის განხილვისას პროცესზე მხოლოდ დაცვის მხარე გამოცხადდა. სახელმწიფო ბრალდების წარმომადგენლები სასამართლო პროცესს არ დასწრებიან.

როგორც მოსამართლე მაია შოშიაშვილმა პროცესზე განაცხადა, 6 ივნისს მთავარ პროკურატურას გაეგზავნა ცნობა დღევანდელი სასამართლო პროცესის შესახებ. პასუხად გუშინ პროკურატურიდან მიიღეს პასუხი, რომ პროკურორები სასამართლო პროცესზე კვლავ ვერ გამოცხადდებოდნენ, რადგან ბათუმში მივლინებაში იმყოფებოდნენ. მოსამართლე მაია შოშიაშვილმა აღნიშნა, რომ მათ გადმოეგზავნათ 4 ივნისით დათარიღებული ბრალდების მხარის წერილი, რომ 4 ივნისიდან 14 ივნისის ჩათვლით, პროკურორები იმყოფებიან ბათუმში სემინარზე.

გიგი უგულავას დაცვის მხარემ განაცხადა, რომ აღნიშნული ფაქტის გამო სასამართლო პროცესი არ გადადებულიყო და უნდა ემსჯელა სასამართლოს შუამდგომლობის დაკმაყოფილების ან არდაკმაყოფილების საკითხზე.

მოსამართლე მაია შოშიაშვილმა განაცხადა, რომ შუამდგომლობის განხილვა ამ პროცესზე პროკურორების დასწრების გარეშე მიზანშეწონილი არ იყო, შესაბამისად, მან მიიღო გადაწყვეტილება, სასამართლო პროცესი ჩაენიშნა. ბრალდებულმა გიგი უგულავამ მომავალი სასამართლო პროცესის თარიღად დაასახელა 4-5 ივლისი. მისი თქმით, ამ პერიოდისათვის საარჩევნო პროცესები უკვე დასრულებული იქნებოდა, თუმცა მოსამართლე მაია შოშიაშვილმა მიიღო გადაწყვეტილება სასამართლო პროცესი 20 ივნისს, 16.00 საათზე ჩანიშნულიყო.

"თბილისის განვითარების ფონდთან" დაკავშირებული სისხლის სამართლის საქმეზე გიგი უგულავას და მასთან ერთად ბრალდებულებს 48 მილიონამდე ლარის გაფლანგვას ედავებიან. ამ საქმეზე ბრალდების მხარეს პროკურორები: გიგა ძნელაძე, ნათია სონღულაშვილი, ქეთევან ჩაჩავა და მალხაზ კაპანაძე წარმოადგენენ.

ამ საქმესთან დაკავშირებით გიგი უგულავას დედაქალაქის მერის უფლებამოსილება შეუჩერდა, ხოლო საკონსტიტუციო სასამართლომ სისხლის სამართლის კოდექსის ის მუხლი, რომლის საფუძველზეც უგულავს უფლებამოსილება შეწუყდა, არაკოსნტიტუციურად სცნო.