პარლამენტის თავდაცვისა და უსაფრთხოების კომიტეტის თავმჯდომარე ირაკლი სესიაშვილი აცხადებს, რომ პოლიტპატიმრების სიის შედგენის დროს შესაძლოა, პარლამენტმა შეცდომები დაუშვა. მისივე თქმით, აღნიშნული შესაძლოა იმან გამოიწვია, რომ ამ პროცესის დაჩქარება იმ პერიოდში აუცილებელი იყო.

"როდესაც პოლიტპატიმრების საკითხს ვიხილავდით, რთული სიტუაცია იყო. მაშინ ჩვენ შევცვალეთ ხელისუფლება და ეს იმ ფონზე, როცა ციხეში არაადამიანურ მოპყრობას ჰქონდა ადგილი. რთულია, იჯდე პარლამენტში, ყველა საქმეს დეტალურად იხილავდე და მთელი რიგი პატიმრები უკანონოდ იყვნენ დაკავებულები და ამას უყურებდნენ. მოგვიწია ამ პროცესის დაჩაქრება. დავეყრდენით საერთაშორისო ანგარიშებს, არასამთავრობო ორაგნიზაციების ინფორმაციას. შეიძლება, შეცდომა დავუშვით, მაგრამ როდესაც ხდება ასეთი გადაწყვეტილების მიღება, ვფიქრობთ, რომ უფრო მეტი სიკეთე გავაკეთეთ",- განაცხადა სესიაშვილმა.

კომიტეტის თავმჯდომარემ უსაფრთხეოების სისტემაზეც ისაუბრა და აღნიშნა, რომ ეს სფერო დღეს ზალიან ძლიერია.

"ყოველდღიური ურთიერთობა მაქვს უსაფრთხოების საკითხთან და შემიძლია, გითხრათ, რომ უსაფრთხოების სიტემის ეფექტურობის ხარისხმა იმატა. ყველგან, სადაც შეიძლება, იყოს საფრთხე, ტარდება პრევენციული ტიპის ღონისძიებები. საფრთხეები ყოველთვის არსებობს, მაგრამ ამის მინიმალიზირებას სახელმწიფო ახერხებს“,- აღნიშნა ირაკლი სესიაშვილმა.

თავდაცვის მინისტრია ირაკლი ალასანიას განცხადებით - “დღეს არსებული სიტუაცია, როდესაც პოლიტპატიმრის სტატუსით გათავისუფლებული პირები ნატო-სა და ევროკავშირის წინააღმდეგ გამოდიან, მაღალი კონტრდაზვერვითი საფრთხის შემცველია და ამნისტიის დროს პარლამენტს ამაზე მეტი დრო უნდა დაეხარჯა”.