სახალხო დამცველი აჭარის უმაღლესი საბჭოს დეპუტატის მედეა ვასაძის ქმედებას ეხმიანება. ომბუდსმენის აპარატის ცნობით, 9 ივნისს ტელეკომპანია TV25-მა გაავრცელა აჭარის უმაღლესი საბჭოს წევრს მედეა ვასაძესა და ჟურნალისტ ჯაბა ანანიძეს შორის შემდგარი სატელეფონო საუბრის ჩანაწერი, რომელშიც დეპუტატი ჟურნალისტის პირად ცხოვრებას ეხება და ემუქრება.

მათივე ინფორმაციით, გუშინვე აღნიშნულ ფაქტთან დაკავშირებით ჟურნალისტმა ჯაბა ანანიძემ შესაბამისი განცხადებით საქართველოს სახალხო დამცველსაც მიმართა.

ჟურნალისტის ინფორმაციით, TV 25-ის ეთერში გავიდა ჯაბა ანანიძის მიერ მომზადებული საგამოძიებო ფილმი - "უმაღლესი კომფორტით". ფილმი აჭარის უმაღლესი საბჭოს დეპუტატების საბიუჯეტო ხარჯებსა და მათი საქმიანობის ეფექტიანობას ეხებოდა. აღნიშნული სატელეფონო საუბარიც ამის შემდეგ შედგა.

"ჟურნალისტის, ისევე როგორც ნებისმიერი ინდივიდის პირადი ცხოვრება ხელშეუხებელია და დაუშვებელია ნებისმიერი ფორმით მისი ხელყოფა. საქართველოს სახალხო დამცველი გმობს მომხდარ ფაქტს და მიიჩნევს, რომ მსგავსი ქმედებები ნებისმიერი თანამდებობის პირის მხრიდან შეიცავს მედიის თავისუფლებაში უხეში ჩარევის ნიშნებს, რაც ეწინააღმდეგება დემოკრატიულ სახელმწიფოში სიტყვისა და გამოხატვის თავისუფლების პრინციპებს. ამასთან, მსგავსი გამონათქვამები არღვევს პირადი ცხოვრების ხელშეუხებლობას.

საქართველოს სახალხო დამცველი მოუწოდებს აჭარის უმაღლეს საბჭოს, შეისწავლონ მედეა ვასაძის ქმედების კანონიერება და მისცენ შესაბამისი შეფასება. თავის მხრივ, დეტალურ დასკვნას სახალხო დამცველი უახლოეს დღეებში გამოაქვეყნებს“, - ნათქვამია განცხადებაში.